Landamento Escolar competi na un manera elite y masal

Den fin di siman di 6 y 7 di maart IBiSA a organisa conhuntamente di Federacion di Landamento AAF e prome competencia escolar pa 2021. E competencia a haya un participacion di 122 mucha muher y 102 mucha homber. Tur esaki danki n’e 19 scolnan cu a stimula nan alumnonan pa participa y representa e scol den e intercambio escolar deportivo.

E evento a bay den un forma rotativo unda e muchanan ta landa den nan categoría di edad y disciplina y na final di e dos dianan ta saca e mihor tempo di cada categoría y disciplina.  

Durante e competencia IBiSA a cumpli cu e protocol deportivo vigente. Pa motibo di esaki IBiSA a haci live stream atrabes di su FB pa duna e mayornan e oportunidad di wak e competenica di nan yiunan. E muchanan a haci dos estilo di landamento esta, Breastroke y Freestyle den un distancia di 25m.

Aruba Aquatics Federation a hunga un papel hopi importante uzando e sistema electronico y tambe a pone na disponibilidad nan cuerpo di hurado p’asina duna e deporte escolar un ambiente elite.