Mariniernan di Region Caribe ta train serca coleganan Mericano

Mariniernan di entre otro Eskuadron 32 di Asalto (32 Raiding Squadron) Aruba y e Destacamento St. Maarten ta train diferente senarionan desafiante, desde dialuna 8 di maart durante e ehersicio ‘Caribbean Urban Warrior 21’ na Estados Unídos. 

Vários biaha pa aña tin entrenamentonan conhunto cu e Mariniernan Mericano di e ‘2d Marine Division’ 2do Divishon di Marina, tanto na Estados Unídos como den e propio region di Reino di Caribe. Trainmento hunto cu unidadnan Mericano ta enfatisá e bon vínculonan entre ámbos pais y e unidadnan, pero tambe ta haci nan capas di intercambiá conocemento y experencia.

Camp LeJeune den Estado Carolina del Norte, ta duna e Mariniernan Hulandes, cu ta ubicá riba diferente isla òf na diferente pais den region Caribe, un chèns único pa train riba un nivel mas halto cu recursonan escaso den entre otro zonanan urbano. Nan lo ta di bishita na ‘II Marine Expeditionary Forces (MEF)’.

E trainen ademas di e localidad único aki ta haci CZMCARIB capas pa train su unidadnan na un nivel mas halto di loke ta posibel den su propio localidad geográfico. Pa medio di e colaboracion cu unidadnan Mericano y agregando e medionan escaso (helicòpter, avion, etc.), en combinacion cu un senario actual, ta forma un entrenamento desafiante pa tanto e mariniernan cu ta participá como e Comandantenan.

Den e preparacion y e ehecucion di e ehersicio aki enfáticamente a tene cuenta cu e.o. e limitacionnan di biahe, cu e pandemia di Covid-19 ta trese cun’e. Previo e biahe e militarnan a bay den Carentena pa evitá mas tanto cu ta posibel contacto cu otro persona. Solamente miembronan di personal cu un tèst di PCR (reaccion den cadena di polimerasa negativo), ta pèrmití pa participá n’e ehersicio.

Tur Militar participante ta biaha pa medio di un buelo charter sali di un ‘bubble’ bay n’e otro, saliendo for di Aruba, via Còrsou y St. Maarten, directamente pa North-Carolina.  Lo tene cuenta cu tur e medidanan adicional cu ta, òf lo bay wòrdo imponé pa Gobièrno Mericano y/òf USMC/United States Marine Corps, Cuerpo di Marina Mericano. E ehersicio ta dura tres siman mas o ménos.