Raport di IMF ta confirma e bon gobernacion di Gabinete Evelyn Wever-Croes

“Nos por a tuma nota cu na momento cu IMF a emiti su raport di Aruba y unda nos Minister President sra. Evelyn Wever-Croes y nos Minister di Finansa y Economia sra. Xiomara Maduro a presenta esaki na pueblo di Aruba. Partido AVP den nan desesperacion a manda e mucha manda di nan cu no tin ningun conocemento mes di kico e raport aki ta encera, pa ataca y critica.

Esaki ta unico manera di opera cu e partido AVP tin y cu a haci hopi daño financiero y economico na pais Aruba. Awe nos lo dedica na informa pueblo e contenido di e raport di IMF cu sin duda a demostra cu Gabinete Evelyn Wever-Croes a tuma e decisionan corecto, pero tambe a hiba un maneho financiero sostenibel cu a percura cu awe nos por papia di recuperacion”, segun Edgard Vrolijk di MEP.

Aruba su economia tabata garando forsa prome cu e pandemia

Den e raport di IMF pueblo por lesa cu e Gobierno actual c’un plan fiscal ambicioso tabata riba e bon caminda pa reforma nos sistema fiscal, pero tambe pa diversifica nos economia. Na 2019 e muestra di bon gobernacion di Gabinete Evelyn Wever-Croes ya tabata visibel unda cu a logra e metanan financiero facilmente stipula dor di Hulanda y e trayectoria pa reduci nos debe na un manera duradero ya a mira su prome frutonan.

Pero lamentablemente Covid-19 a trece cune un caida enorme den nos pilar economico cu ta turismo, unda cu nos a conoce un reduccion pa 2020 di 67% di nos turismo internacional. Y esaki sigur a percura cu a bin hopi incertidumbre riba nivel laboral, pero tambe pa empresanan debi n’e falta di entrada cu Aruba tabata custumbra di tin, Edgard Vrolijk a sigui splica.

Gobierno a actua liher pa percura cu nos pais a wanta e sla di Covid-19

IMF ta enfatisa cu e accionan cu Gabinete Evelyn Wever-Croes a implementa a percura cu awe nos por papia di recuperacion y cu a percura p’e pais aki no ser destrui. IMF ta menciona e implementacion di FASE p’esnan cu a perde trabao, subsidio di salario na trahadornan pa yuda mantene nan trabao, ayudo financiero na empresanan chikito y mediano, sosten financiero na AZV y na SVB.

Banda di esaki a menciona e reforma fiscal cu a ser implementa cu incentivonan p’e empresanan chikito, pero tambe reduccion di Loonbelasting cu a yuda den e recuperacion. Y sigur e ayudo fiscal hunto cu maneho monetario di Banco Central a percura pa contene cu companianan lo a bati bancarota na gran cantidad y tambe a percura pa contene e cifra di desempleo na Aruba.

IMF ta keda menciona den nan raport cu Gobierno actual a logra stabilisa finansa di pais Aruba y unda pueblo ta corda a haya esaki na 93% di nos GDP na 2017 bao Gabinete Mike Eman 1 y 2 na debe, pero ya den dos aña di Gabinete Evelyn Wever-Croes a baha esaki na 72% di nos GDP y awor cu Covid a dal nos y pa mal maneho financiero di pasado di AVP di crea debe y no tin buffer, awe nos a yega te 117% di nos GDP na debe.

Proyectonan pa futuro

Pa 2021 ta proyecta un crecemento economico di 5%, cu ta bin danki n’e maneho di test pa Covid, vacunacion compara cu otro islanan y unda cu te pa 2025 nos GDP lo por yega e GDP di prome cu Covid, pues e 72% cu Gabinete Evelyn a logra yega den dos aña di tempo cu tabata un record pa un pais cu tanto debe acumula.

Na 2021 nos GDP (130%) lo conoce un aumento pa motibo cu ainda nos economia no a recupera y nos debe a keda crece pa motibo di Covid cu a percura pa menos entrada. Pero despues di 2021 c’un maneho financiero manera cu a bin ta pasa desde 2017, ta mustra cu nos GDP lo conoce un reduccion basta grandi.

Pa logra esaki ta instrumental pa extende e aporte financiero duna na 2021 pa por recupra. Ta prematuro pa pensa di corta e sosten fiscal pa motibo cu e recuperacion por dura mas cu por ser premira.

Y banda di esaki mester mehora nos sistema pa cobra impuesto y dividi e peso fiscal husto den momentonan di crisis y den esaki ta papia di reforma nos impuesto den diferente fase entrenan ta menciona bin cu un VAT unda cu esaki lo crea beneficio pa sector laboral cu lo sa unda lo aloca nan placa, pero sigur lo percura p’esnan cu no ta contribui manera debe de ser por contribui y sigur den e sistema di tax aki lo por ser usa entre otro pa promove un manera mas saludabel di biba cu lo traduci den menos costo pa seguro medico na Aruba. Y sigur ta di vital importancia pa gobiernonan keda mantene nan gastonan abao y mester percura pa mantene reserve di Banco Central uno fuerte.

Pues resumiendo locual cu IMF a trece dilanti, ta indica hopi cla cu desde 2017 Gabinete Evelyn Wever Croes a hiba un maneho financiero responsabel y sostenibel unda cu di 2017 cu a haya nos GDP na 93% y a logra reduci esaki na 72% den dos aña di tempo y unda na aña 2019 Aruba a conoce un surplus.

A ser demostra cu Aruba tabata riba e bon caminda pa cuminsa reduci su debenan. Y otro aspecto importante cu IMF ta menciona t’e accionnan rapido cu Gabinete Evelyn Wever-Croes a implementa entrenan ayudo di Fase, Loonsubsidie, ayudo financiero na empresanan chikito y mediano y incentivonan fiscal a haci cu awe por papia di recuperacion.

Conclusion

Ta di lamenta cu te dia di awe esnan di partido AVP no kier realisa e desaster financiero cu nan a causa Aruba y mas pio ainda ta cu nan ta hendenan di mala fe. Nos no por lubida cu memey di crisis na 2020 partido AVP a vota contra presupuesto di Aruba, unda cu danki n’e partidonan di coalicion por a pasa e presupuesto aki cu a percura pa mas di 4000 tata y mama di famia por a haya Fase y mas di 22000 hende por a haya Loonsubsidie y tambe nos por a yuda e companianan chikito y mediano den tempo dificil aki. Danki n’e partidonan di coalicion den Parlamento cu awe e pueblo ki por a ser yuda pasobra si ta pa AVP mester a laga e pueblo aki bandona y sin ayudo basta nan si di AVP por keda cobra salario halto sin bin trabao y sigur pa nan por tin chens di bin bek y sigui explota Aruba financieramente un biaha mas.

Presupuesto 2021 ta na caminda y unda un biaha mas den esaki lo mester percura pa sigui yuda e pueblo di Aruba supera e crisis grandi aki y su consecuencianan financiero, economico y salud cu Covid-19 a trece cune. Pues a yega momento pa partido AVP cuminsa madura y stop di hunga cu sentimento, sufrimento y dolor di un pueblo cu ta pasando den e pio momentonanan den historia di Aruba.

Nos ta spera cu pa presupuesto 2021 partido AVP lo sa di sostene e maneho cu Gabinete Evelyn Wever-Croes a bin ta hiba cu a percura pa Aruba por a wanta e sla duro cu Covid a bin cune y sigur pa nos por recupera di esaki mas liher posibel, Edgard Vrolijk a conclui.