Refereenan a repasa reglanan y diferente hugada relaciona n’e reglamentonan

E refereenan di Arubaanse Voetbal Bond (AVB) a bin hunto pa discuti e resultadonan di un “fitness test” cu AVB a organisa p’e refereenan y alabes a probecha pa repasa e reglanan existente y esnan nobo. E intencion tras di esaki pa di e forma aki e refereenan ta “up to date” y den optima forma na momento cu reanuda e diferente campeonatonan y/of torneonan di AVB.

Despues di un periodo basta largo, pa motibo di e medidanan tuma pa Gobierno y Crisisteam referente Covid-19, e refereenan a inicia nan actividadnan atrobe. Manera cu ta e caso tur caminda, e medidanan tuma relaciona cu Covid-19, tambe a afecta e refereenan y nan actividadnan. Entre otro AVB mester a sera e oficina di e departamento di referee na dos ocasion. Apesar di esaki, e refereenan no a para keto, pero a sigui train ya cu nan si tabatin trainingnan cu nan mester a atende. Nan por a haci esey den aire liber y no ta stroba e actividad aki.

Poco-poco a cuminsa cu e actividadnan y asina aki a cuminsa organisa diferente encuentro cu e refereenan y a cuminsa intensiva e actividadnan tambe. Monique Ras, Head of Referee di AVB, a splica cu esey a pone cu nan a tuma e decision di organisa un workshop caminda cu a repasa e reglanan y e diferente situacion/hugadanan relaciona n’e reglamentonan p’asina e refereenan keda “up to date”.

E tipo di workshopnan aki ta algo cu ta tuma lugar constantemente, di cual tin biaha ta dos of tres biaha pa luna durante henter aña. E ta algo cu ta programa, segun Monique Ras. E refereenan ta constantemente den les y ta haya curso pa nan por desaroya nan mes y pa tin e conocemento y experticio na momento cu mester dirigi un wega di futbol.

Ta intencion di e departamento di referee pa busca refereenan nobo, ya cu tin e necesidad di mas referee pa tur e weganan organisa pa AVB.

Esaki ta riba programacion caba y e instructor tecnico di e departamento di referee, Oslin (Oshi) Kock, ya tin e programa aki hinca den otro caba. Na momento cu keda cla cu e parti organisatorio y administrativo, lo inicia e curso aki. Segun Monique Ras, nan idea ta pa hacie dos biaha pa aña y esaki lo ta den luna di mei 2021, mientras e siguiente lo tuma lugar den luna di augustus 2021. Naturalmente, si e situacion relaciona cu Covid-19 permiti.

Naturalmente si por tin personanan, specialmente hobennan cu ta interesa den e curso di referee, nan por yama na 587-7357 na oficina di AVB, na Shaba y puntra pa Monique Ras. E lo ta na oficina di dialuna pa diabierna y por yama pa ricibi tur informacion necesario. Asina interesadonan por inscribi nan nomber p’e curso cu ta na caminda.