Señor Marinus Wegereef, ex Chef Protocol di AVP t’e feliz ganador di rifa di MEP

Na sede di partido MEP, diadomingo 28 di februari, a tuma lugar e sorteo virtual di e rifa pa recauda fondo pa campaña electoral na september benidero. Partido MEP ta gradici tur esnan cu a contribui den e recaudacion aki pa yuda partido cu fondo pa campaña.

Nos ta den aña di eleccion y un aña particular dor di Covid-19 sinembargo mester cuminsa prepara pa eleccion 2021 y p’esaki partido MEP ta conta cu sosten di pueblo di Aruba. E rifa a wordo hopi bon bendi pa cua partido MEP ta hopi satisfecho y gradecido.

Señor Marinus Wegereef, kende tabata Chef Protocol di Gobiernonan di AVP, t’e feliz ganador di e rifa di MEP y a cumpra ticket for di su candidato faborito Parlamentario Rocco Tjon. Marinus Wegereef a prefera di ricibi placa cash na balor di e auto nobo. Dialuna merdia, Presidente di Partido, señor Hendrik Tevreden a entrega e premio na señor Wegereef. Partido MEP ta felicita Marinus Wegereef y ta gradici’e pa su contribucion na nos partido y na nos campaña electoral.