Acceso na pier na Weststraat semper lo keda accesibel pa tur persona

Poundwise Investment & Developments ta un compania estableci na Aruba, cu un trayectoria

impecabel cu mas di 50 aña di experienca internacional den su industria. Cu mas di 20 aña estableci na Aruba, e grupo Perret a siña conoce y aprecia tur loke Aruba tin pa ofrece. Asina a inverti den desaroyo di Oceania, Blue Aruba y Azure Residences, atraendo e bishitante di balor halto cu ta apoya e crecimento di balor economico di nos industria di turismo y creando centenares di cupo di trabou. Na aña 2017 Poundwise a cumpra na un findishi e edificio di condominio situa na Weststaat, cu pa hopi aña tabata para sin ningun destino.

Poundwise conoce e vision pa cu e area di Oranjestad y ta kere den e potencialnan cu Oranjestad y area di Downtown tin pa ofrece, particularmente Weststraat.

Continuidad di proyectonan den e area di Oranjestad ta sumamente importante pa turismo di Aruba y mas ainda den su etapa di reactivacion den 2021. Poundwise ta convenci cu esaki t’e incentiva necesario pa downtown di Oranjestad y pa tur negoshi, chikito y grandi, den centro di ciudad. Solamente di e forma aki ta crea un balor superior pa yuda e area aki logra bek su potencial y bolbe competi riba panorama mundial turistico. E meta comun ta pa cu e area specifico di Weststraat por logra re-posiciona su mes como un Weststraat mas fuerte, resiliente, di mayor atraccion den Oranjestad, safe, limpi y bunita.

Esaki tambe ta importante pa nos industria crucero, como cu ta na e dicho area aki tur turista crucero ta drenta Aruba.

Despues di combersacionnan desde 2017, a crea un relacion unda palabracionnan concreto a wordo haci cu tur stakeholders. Un acuerdo mutuo entre Aruba Ports Authority (APA) y instancianan concerni ta aclarea cu e area specifico pega cu e pier di e piscadornan, conoci como Waf’i Rancho, ta wordo renoba y manteni debidamente conforme e vision pa cu revitalisacion di Oranjestad y segun plan aproba di embeyecimento di Weststraat. Acceso p’e pier semper a wordo garantisa pa uzo di tur piscado. Harbour House ta laga un area di parkeo priva disponible pa acceso pa piscadornan y tur persona cu ta bin haci compras den e area, of bishita un cafe of restaurant situa na Harbourwalk.

Poundwise semper a duna balor cultural di e area y ta compronde e importancia di e area p’e piscadornan. Pa cu esey Poundwise a compromete su mes desde inicio na aña 2017, pa traha hunto cu tur stakeholders, manteniendo respet mutuo, pa yega na un area renoba y bunita pa tur hende. Fuera di duna e estimulo necesario pa comercio y atraendo fluho di hende pa cu e area, Poundwise a propone pa construi un facilidad pa deposito, baño y awa fresco p’e piscadornan. Esaki ta forma parti di Poundwise su maneho di Responsabilidad Social Corporativo, unda cu ya pa 20 aña e compania a sa di aporta grandemente na diferente proyecto cu metanan social, cultural y educacional pa Aruba.

Downtown di Oranjestad ta un area antes domina p’e bida nocturno, pero pa mas di 17 aña a bira un area cu su retonan economico, di seguridad y infrastructural. Poundwise ta contento y orguyoso di por tin e oportunidad di trece un cambio real di calidad y duradero, creando oportunidadnan nobo pa tur comerciante den e area cu beneficio general pa Aruba, incluyendo e grupo di piscadornan di e area. Di e forma aki Poundwise ta sigui aporta na revitalisacion di Downtown Oranjestad, como tambe na reactivacion economico di turismo di Aruba