Capitan cu falta di respet pa autoridad

Ayera mainta den careda di 09:15 Wardacosta na Aruba a haci un control rutinario riba e boto ‘VIKING’ cu tabatin 2 persona masculino abordo. E capitan en cuestion no kier a coopera cu Wardacosta for di un inicio.

Na momento di control a constata cu su papelnan pa nabega no tabata na ordo y a duna e capitan un multa p’esaki.

Despues di ricibi e multa e capitan a cuminsa insulta e personal di Wardacosta na un manera agresivo. Personal di Wardacosta a purba combersa cu e capitan, pero esaki no kier a scucha.

E ora ey e personal di Wardacosta a dicidi di detene e capitan pa motibo di a insulta un autoridad den su funcion. Mes momento a trece e boto aden pa mas investigacion y a resulta cu e tripulante abordo no tabatin su papelnan valido. A base di esaki a transporta e persona pa Warda nos Costa.

E capitan mester a bay na Warda di Polis San Nicolas pa interrogacion. Despues di e interrogacion e capitan a haya su pertenencianan bek y por a bay cas.