Cosecha su campaña creativo pa Himno & Bandera

Pueblo di Aruba ta orguyoso pa celebra e aña aki 35 aña di existencia di Status Aparte y 45 aña di Himno y Bandera. A pesar di tur loke nos pueblo a experiencia den e ultimo aña dor di e pandemia di Covid-19, e celebracion aki ta un logro grandi di identidad den nos pueblo na cual Cosecha kier duna atencion. Ademas, arte ta forma parti di e bunita cultura di Aruba y expresando nos amor pa Aruba na un manera creativo nos ta yena nos curason cu orguyo.

En conexion cu e celebracion di Himno y Bandera, Cosecha ta presenta un campaña inovativo.

E campaña ta brinda oportunidad na pueblo di Aruba pa expresa nan mes por medio di un pintura relaciona cu Himno y Bandera riba un “Tote Bag”, un tas.

Por haci e actividad aki den nan propio hogar y cu famia y amistad. Cosecha kier trece union por medio di arte y demostra Aruba su talentonan den un bunita campaña. Pueblo di Aruba por participa te cu 18 di maart benidero.

E tasnan aki ta disponibel na tienda di Cosecha na Oranjestad of San Nicolas. Cada participante di e campaña aki por pinta nan propio creacion riba e tas y laga Aruba su Himno y Bandera inspira nan.

Pa por participa cu e campaña, e participante mester saca un potret di su creacion. E mester post e potret aki riba Facebook agregando e hashtag #pintabobandera y tag Cosecha (@arubacosecha) den e post. Por pidi famia, amistades y conocirnan pa like nan potret. E campaña no ta rekeri limitacion minimo ni maximo di edad dus tur hende por participa.

E participante cu e mayoria cantidad di “Likes” ta sali ganador. E ganador lo wordo anuncia dia 19 di maart 2021 riba nos Facebook page y e lo ricibi 2 ticket pa workshops creativo na Cosecha. Cosecha ta spera cu e campaña aki nos por curasha pueblo di Aruba pa hisa bandera y demostra union pa nos celebracion di Himno y Bandera na un manera creativo.

Pa mas informacion por tuma contacto cu Cosecha Oranjestad na telefoon 5878709. Tambe por manda un email na cosechaworkshop@gmail.com.

Pa por keda informa di Cosecha su workshopnan, artesanonan, artistanan y nan webshop nobo por bishita nan Facebook page: Aruba-Cosecha Instagram page: cosecha_aruba y Webpage: www.arubacosecha.com.