Decision di Prome Minister den caso di scolnan en corto: S.O.S.

Minister Presidente Evelyn Wever Croes a duna Sindicato di Maestro y SEPPA un siman p’e duna nan claridad riba mudamento di e scol Paso Sigur pa Emmaschool caminda Minister di Enseñansa, Rudy Lampe, kier uni e dos scolnan aki sin sikiera a dialoga cu esaki cu esnan envolvi.

Ta algo sumamente importante, algo sumamente delicado, pero tabata un sorpresa cu Minister Presidente ta duna e impresion cu pa su persona, ta solamente un solucion e kier a busca temporal pa tene tur hende contento y su Gobierno sigui existi.

Increibel cu diamars atardi maestronan ta ricibi un WSP di Prome Minister, cu tur e hendenan cu e tin den su oficina, tur su coordonadonan, cu ningun por a hinca un carta decente den otro pa un asunto asina delicado, manera formacion y educacion di e muchanan.

Den curso di ayera Prome Minister a dirigi un carta n’e maestronan caminda ta wordo informa cu lo no sigui cu e proceso pa uni e dos scolnan aki hunto, pero na mes momento ta informa e maestronan cu e mudamento di e scol Paso Sigur pa edificio di Emmaschool, Minister lo sigui contempla p’esaki tog tuma lugar.

Pues un wega ridiculo di un Prome Minister y su Minister di Enseñansa cu maestronan di scol ya cu den cierto forma Evelyn ta crea e impresion cu el a duna e maestronan algo, pero a laga e Minister cu algo tambe, loke ta net e problema grandi cu tin.

Pa usa un expresion hopi conoci rond mundo na Inlges, e solucion di Prome Minister den e caso di Emmaschool y Paso Sigur ta: “SOS.”

No tin solucion y na mes momento tin cu analisa si e decision di Minister Presidente lo tin base legal manera a sosode cu decisionnan cu el a trata di cambia den pasado caba di Minister Lampe.

Segun e Landsverordening Instelling Ministeries ta Rudy Lampe t’esun legalmante responsabel pa tuma e tipo di decisionnan aki y ta loke el a reta Prome Minister caba den pasado ora cu e no a respeta decision cu e prome mandatario a trata di cambia.

Hasta un mocion di Parlamento, cu ta e instituto cu ta hefe di Gobierno, Minister Lampe a pone un banda y awor ta manda un carta caminda ta bisa cu a para e unificacion di e dos scolnan y cu Minister Lampe lo sinta cu directiva di e dos scolnan pa mira con lo atende e mudacion di Paso Sigur p’e edificio di Emmaschool.

Prome Minister a crea un bom den e asunto aki ya cu si tuma na consideracion tur loke Minister Lampe a haci den pasado caba, su falta di respet pa directiva y maestronan di scol, ta pone tur hende duda den loke e ta capas di haci den dianan dilanti.

Minister Lampe simplemente no ta di confia, e no tin palabra y e ta haci loke cu e kier ya cu su partido tin un asiento den Parlamento cu sin e sosten aki, Prome Minister lo no tin Gobierno p’e dirigi.

E carta di Prome Minister ta hopi swak y Gabinete Wever Croes lo bay den historia como e Gobierno caminda un Prome Minister simplemente no tabatin dominio riba su dos partnernan den gobernacion ya cu tampoco e tin poder algun riba fraccion di POR cu tambe ta sinti su mes poderoso cu henter e fraccion di MEP.

Sindicato di e Maestronan a bin ta buscando claridad cerca Prome Minister pa casi dos aña caba si no ta mas, pero nunca el a duna claridad y trankilidad ya cu e tin cu guli tur loke su partner di un asiento kier haci, ya cu keda Prome Minister e ta balora mucho mas cu educacion y formacion di muchanan. Cu e carta di Prome Minister Evelyn Wever Croes por conclui cu Minister Rudy Lampe y fraccion di RED ta un Gobierno den un Gobierno, caminda esun mas flaco tin mas forsa cu esun mas gordo y ta tristo pa pueblo di Aruba mira tur e cosnan aki tuma lugar, pa colmo pa un Prome Minister cu a propaga gobernacion di integridad y e ser humano ta central.