Disciplina den un Famia Mixto

Kico precies ta un famia mixto? E ta zona simpel pero den realidad un famia mixto por bin den diferente formanan. Un famia mixto ta un famia unda un of ambos pareha ta trece un of mas yiu di un relacion anterior y ta dicidi di biba hunto y kisas ta añadi yiunan di nan mes despues di tempo.

E area mas dificil bibando den un famia mixto t’e disciplina di un padrastro of madastra pa cu e muchanan. Ken ta traha e reglanan? Ken mester reforsa e reglanan?

Segun Psicologo Patricia Papernow, ta importante p’e padrastro of madrastro tin un mentalidad di “conexion prome cu coreccion.” Kiermen laga e mayor biologico ta encarga cu e mayoria di e disciplina di e mucha, mientras e padrastro/madrastra ta traha riba nan relacion cu e mucha.

Sea bo ta drentando den un famia mixto of bo ta den un caba, nos tin un lista di cosnan pa haci y no haci cu a wordo traha dor di un grupo di expertonan specificamente tocante e topico di disciplina den un famia mixto.

PA HACI:

Keda comunica cu bo pareha. Traha tempo pa papia cu bo pareha tocante kico ta trahando y kico no ta trahando of kico por mehora.

Bo mester corda cu boso a bin for di diferente cultura di famia y boso tur dos tin un diferente posicion den boso famia. Ta importante pa keda habri pa otro apesar di boso diferencianan.

ESTABLECE UN CIERTO NIVEL DI RESPET

E mayor biologico no por forsa nan yiu pa gusta of stima e padrastro/madrastro, pero e mayor por exigi un cierto nivel di respet. Ta importante p’e mayor biologico comunica e diferencia entre amor/stimacion y respet na su yiunan. E mayor mester splica su yiunan kico su expectativanan ta tocante con nan mester trata e padrastro/madrastra.

TRAHA RIBA BO RELACION CU BO YIU DI CRIANSA

Haci un esfuerso pa pasa tempo “one-on-one” cu bo yiu di criansa. Haci actividadnan cu ta “schouder-pa-schouder.” Esaki ta encera bay cinema hunto, hunga futbol, haci manicure hunto, core bais, etc, enbes di sinta cara-pa-cara pa papia y conoce otro.

Si ta posibel, kies un actividad cu ningun di e mayornan biologico ta haci cu e mucha caba. Esaki ta elimina e sintimento di competencia.

REALISA CU BO YIU(NAN) DI CRIANSA LO TEST BO

Muchanan lo purba di pusha e limite ora tin un persona nobo den tow. E muchanan lo kier wak precies con hopi control nan tin y hasta purba di pone mayornan contra otro.

Keda cu un comunicacion habri entre abo cu bo pareha tocante retonan cu bo ta encontra como padrastro/madrastra.

ANIMA Y PREMIA COMPORTACIONAN APROPIA

Terapista di famia ‘Carrie Krawiec’ ta recomenda pa un padrastro/madrastra enfoca riba animacion di bon comportacion y actitud embes di disciplina comportacion malo.

Mester corda cu un mayor biologico tin e laso caba cu nan yiunan cu ta hacie mas facil pa disciplina.

NO HACI:

No cuminsa cu hopi cambio. No bin cu un lista di cos cu bo kier cambia pa “mehora” cosnan. Sea sensitivo cu e muchanan ta pasando den hopi cambio caba. (Divorcio, rumannan nobo, cas nobo, etc). Si bo bin cu hopi cambio, e muchanan lo por pensa cu bo ta purbando di stuf tur cos di nan bida prome cu bo a bin.

Duna bo famia tempo pa custumbra cu e manera nobo di biba. E ora ey por enfoca riba un cambio si ta necesario. Tene na cuenta cu como padrastro/madrastro, bo tambe mester ta flexibel pa cambionan.

Segun estudio, e por tuma 4 pa 7 aña pa un famia mixto cuminsa functiona manera un famia.

NO BIRA E DISCIPLINARIO

Expertonan tur ta di acuerdo cu un padrastro/madrastra no mester actua manera un disciplinario unda e estilo di educa ta autoritario (streng, hopi control).

Te ora bo tin un bon laso cu e muchanan, nan no kier wak bo como e figura di autoridad y por resisti bo intento pa disciplina nan.

Loke si bo por haci ta recorda e muchanan tocante e reglanan y reporta nan comportacion bek n’e mayor biologico.

NO TUMA TUR COS PERSONAL

E muchanan ta tratando cu nan mes un sentimentonan di perdida, rabia, y confusion tocante e divorcio of pareha nobo.

E lo ta facil pa pensa cu nan mal comportacion ta un atake directo riba bo como e ‘pareha nobo,’ pero corda cu e muchanan mester espacio y tempo pa procesa tur e cambionan cu ta pasando den nan bida. 

Hssta e yiunan biologico sa rabia cu nan mayornan tin biaha. Pues den un situacion di mal comportacion y falta di respect, keda calmo y no tume personal. Fuente:  https://www.parents.com/parenting/dynamics/how-to-discipline-child-step-parent/