E misterio di Lotto pa Deporte su jaarrekeningnan

Investigacion periodistico di AWEMainta ta mustra cu CAFT (CFT di Aruba) den su carta di dia 19 januari 2021 pa Gobierno di Aruba ta menciona Fundacion Lotto pa Deporte y su cuentanan anual (jaarrekeningen).

Riba pagina nr. 3 di e carta di CAFT, ta menciona Fundacion Lotto pa Deporte cu ta cay den categoria di “Instellingen voortvloeiende uit Wetgeving“. Ta kico precies CAFT kier men cu esaki no ta conoci.

Loke si ta bon conoci ta cu Lotto pa Deporte ta nenga di duna Ministro di Deporte, sr. Dangui Oduber, informacion entre otro e cuentanan anual.

Lotto ta opera den secrecia sin transparencia pa cu Ministro di Deporte. A gasta miles y miles di placa cu por a bay pa deporte pa bringa Ministro di Deporte den Corte. Sigur esaki a perhudica deportistanan cu no ta haya subsidio ni donacion manera mester ta.

Den e carta concerni, ta menciona tambe riba pagina 4 cu CAFT a ricibi e cuenta anual di 2018 di Fundacion Lotto pa Deporte y falta ainda pa haya cuentanan anual  2015, 2016, 2017 y 2019.

Esaki ta hopi straño mes, pasobra e fundacion no a caba di entrega 2015, 2016 y 2017, pero ta entrega 2018 so. E ora ey pregunta logico cu ta surgi con confiabel e posicion financiero di Lotto ta pa cu 1 januari 2018 manera cu e ta poni den e cuenta anual di 2018, pasobra remarcabel ta cu no a entrega e cuentanan di e añanan anterior.

Otro pregunta importante ta si e cuenta anual  2018 a keda aproba si of no door di Accountant of ta un concepto sin base profesional traha riba un diadomingo bou di un scotch soda.

Tambe ta surgi e pregunta grandi si Lotto pa Deporte a duna su hefe e Ministro di Deporte sr. Dangui Oduber tambe un copia di e cuenta anual 2018. Si t’asina, ta bon pa manda esaki pa Centrale Accountants Dienst di Aruba tambe pa nan haci un quick scan riba e cuenta anual 2018.

Banda di esey e actual Director di Lotto, un ex-politico, Roland Tuitt den su “One Man Show” riba Social Media a bisa cu supuestamente na december 2020 tur e cuentanan anual di Lotto lo ta cla. Esaki ta mustra di ta un olifante blanco. Si no t’asina pueblo kier mira tur e cuentanan anual desde 2009 riba website di Aruba Lottery.

For di aña 2009/2010 e mesun hendenan di e Hunta di Supervision aki ta den Lotto. No lubida cu e facilidadnan deportivo cu ta den cuentanan anual di Lotto ta patrimonio di pueblo. Ta unicamente un investigacion independiente so por determina cu tin o no tin “zuivere koffie” den Lotto pa Deporte.