Gobierno te ainda no tin un plan social-laboral pa atende cu desempleo y pobresa

Parlamentario di AVP, drs. Mervin Wyatt-Ras den un comunicado a trece padilanti su preocupacion pa cu nos ciudadanonan cu a perde nan trabou dor di Covid-19 y cu no tin entrada ni di Loonsubsidie ni di FASE, dor di cual nan no por cumpli cu pago di nan gastonan di awa, coriente, cuminda, debe y hasta a perde nan cas/auto.

Tin di e ciudadanonan aki cu ni ta ricibi pakete di cuminda y ta depende di famia pa come. Tambe tin ciudadano cu a keda cu trabou, pero ta gana 50-60% menos, dor di cual nan tampoco por cumpli cu hopi di nan gasto y obligacionnan financiero.  

Mientrastanto Gobierno te ainda no tin niun plan social structural p’e personanan aki. Ainda e presupuesto di e aña aki no a yega Parlamento, mientras e mester a ser entrega na Staten dia 1 di september di aña pasa, segun nos Constitucion ta indica. Despues di 5 luna ainda Gobierno no tin un vision ni maneho social-laboral pa atende cu desempleo y yuda nos hendenan haya trabou y entrada. No tin un maneho financiero- economico pa nos pais.

FASE lo termina pronto cu tur su consecuencianan pa entrada di mas di 14.000 persona. 

Den un entrevista sr. Raymond Gradus di CFT a trece padilanti cu Gobierno di Aruba no ta cumpli cu reglanan ni cu ley pa entrega presupuesto na tempo. 

Evelin Wever-Croes djies pa haya par di miyon a mara nos pa 7 aña na cadena cu Hulanda pa medio di 2 Rijkswet, sin consulta cu pueblo, minando nos autonomia y e autoridad di Staten. E Rijkswettrn lo reglamenta Raft y COHO.

COHO lo ta un entidad cu lo introduci y supervisa medidanan treci pa pueblo bat paga. 

Wever-Croes a duna di conoce den Parlamento cu e ta prefera pa Hulandesnan bin atende cu e cantidad di personal den aparato gubernamental. Aki e ta tira responsabilidad riba Hulandesnan.

Minister di Finanza den Parlamento a menciona cu den e pakete di reforma tin BTW y na mesun momento Xiomara Maduro a para indica cu e diferencia entre BBO y BTW ta tres letter. E ta haci pues comosifuera cu nan lo no introduci BTW di 12.5%, mientras cu esaki ta parti di e landspakket.

Introduccion di BTW lo encera mas aumento di costo di bida. Den practica di tur dia esaki lo nifica mas subida di prijsnan y gastonan di awa, coriente y cuminda di tur dia. Atrobe e placa cu nos hendenan tin sea dor di trabou of ayudo no lo yega pa nada.

Sin papia di debenan cu no por ser paga. Kico e Gobierno aki hunto cu COHO kier? Pa nos hendenan muri di hamber? Aumenta pobresa? 

Wyatt-Ras ta lamenta e actitud di Gobierno intransparente aki cu no ta informa gremio sindical ni comercial, tampoco nos pueblo, kico nan ta haci pasobra probablemente nan ta kere cu tur hende lo ta bobo. 

Aruba sigur no merece un Gobierno intransparente, incapas y dysfuncional manera esaki, forma dor di MEP hunto cu partidonan chikito.

Ya caba a corta den salarionan di empleadonan publico, como tambe gastonan di cuido medico. Mientras cu ta corta den AZV, Laga di nos hendenan sin djente, sin suficiente medicina ni cuido medico den exterior, no ta scucha mediconan y esakinan ta haña nan mes ta bin Parlamento pa nan a expresa nan preocupacion. 

No por perde fo’i bista cu ainda Aruba no a domina Covid-19. 

A registra dia 9 di maart un cantidad di 20 caso nobo, di cual 4 ta no residente. Tin 205 caso activo, e cantidad di fayecido a aumenta na 77 y tin un total di 21 persona interna na Hospital di cual 9 ta den Cuido Intensivo y 12 riba unidad general di Covid. Tambe tin e diferente variantenan dor di cual contagio ta mas rapido. 

Gobierno a anuncia cu 2021 t’e aña di recuperacion pa Aruba.

Esaki mientras cu AHATA ta informa cu ocupacion di hotel na februari tabata 70% menos cu aña pasa y AAA y ATA tin prognosticonan contrario na Gobierno. 

Wyatt-Ras ta haya cu Gobierno mester ta mas honesto cu nos pueblo y haci loke el a priminti di ta integro y transparente.