Homber a purba ataca hoben di 17 aña na Noord

NOORD- Recien un hoben di 17 aña a bay core per su rutina y a encontra su mes den peliger direpente. E mama di e hoben a comparti riba Facebook pa alerta esnan den area y rest’i Aruba:

“Mi kier a alerta bario di Noord di lo siguiente. Ayera tardi mi yiu homber di 17 aña a sali core bay tanki di alto vista locual e sa haci como sport 3 biaha pa siman. Na e tanki el a stop un rato pa descansa y un meneer bruin bon bisti kier a atac’e. E persona a kita su dashi y aparentemente su intencion tawata pa pasa e dashi rond di e nek di mi yiu. Mi yiu a ripara y a core baha for di e tanki, e persona a persigui’e te un momento mi yiu a drenta mondi y sconde, e ta calcula 30 pa 45 min. E mes a perde den mondi, a sali cu hopi moeite y e persona a warda riba dje. Mi yiu a sigui core bin bek direccion su cas, pero e meneer a coy su auto y sigui su tras. Na dado momento mi yiu a wak un cas di number habri y core drenta y pidi e pareha yudansa. El a keda cerca e personan basta rato y e auto a keda pasa hopi biaha den buskeda di mi yiu. Nan no a wak e nr. di auto, a bira scur. Nan a wak un auto preto Kia Sorento basta nobo. E meneer den auto ta papia ingles, e ta color bruin y tawata bon bisti cu camisa y dashi. Nos a pone denuncia na polis. Pls pa tur hende cu ta haci sport aki banda, boso cuida curpa e no ta nada leuk. Mi yiu ta tur na cadushi y tur rasca y c’un trauma basta fuerte. Ban cuida otro y si mira algo straño, meld.”

Te ainda no a tende nada, si e homber a wordo gara of no.