Inicio di programa di Formacion Social na Aruba

Otro programa di Formacion Social (SVT) a cuminsa dialuna 8 maart 2021 pa di 14 biaha na Mariniers Kazerne Savaneta. Un total di 24 hoben a presenta na porta di kazerne, na unda cu nan lo sigi e prome parti di trayecto di Formacion Social durante e proximo 4 lunanan.

Despues di e periodo aki, nan lo mester core stage na un periodo di 8 luna na diferente compania particular of di Gobierno.

Den e trayecto di Formacion Social, e cursistanan lo haña diferente les cu lo siña nan con pa traha den grupo y demostra nan habilidad cu ta inclui cooperacion, disciplina, structura y responsabilidad.

E proposito di SVT ta pa prepara nos hobennan cu no a logra termina nan estudio y pa un motibo of otro a haña nan mes den dificultad p’asina nan por haña un trabao y un futuro den sociedad. 

Defensa lo percura pa yuda y stimula e hobennan aki pa un personalidad proactivo, responsabel y independiente.

Defensa ta encarga di e trayecto Formacion Social riba petition di Ministerio di Asunto Social y Labor. SVT ta un resultado di un acuerdo haci entre Gobierno di Aruba cu Defensa di region Caribe. Mas o menos un luna pasa Gobierno di Aruba y Defensa Hulandes a firma un convenant nobo.

Den augustus di e aña aki lo inicia pa prome biaha un SVT pa hobennan femenino.