Investigacion tumando lugar pa fraude cu por yega un miyon florin na DIMP

Rumornan a bira oficial, esta cu na Departamento di Impuesto tin malversacion a tuma lugar di miles y miles di florin, cual na final lo por alcansa of hasta supera un miyon florin.

Mucho informacion no tin disponibel n’e momentonan aki, ya cu Director di e departamento solamente a confirma cu tin un investigacion andando y cu mester spera e proceso aki tuma lugar prome cu por duna mas informacion. Y el a referi pa tuma contacto cu Minsterio Publico, cu nan su turno, a duna di conoce:”Por lo pronto nos no tin comentario”  y a bolbe referi pa papia cu Directora di DIMP.

Tampoco ta conoci si detencion a cay caba of si a manda un of mas persona cas pa haci e investigacion, pero ta un hecho cu e fraude aki por bira algo miyonario mirando informacionan extra oficial cu AWEMainta a ricibi riba caso.

Sinembargo ta keda algo cu ta laga hopi duda den e maneho di e departamento aki, cu ta un departamento asina importante di Gobierno, cu mester tin tur pero tur control necesario, algo asina por tuma lugar y segun Directora mes a declara cu ta mustra di ta algo cu tin algun aña tumando lugar caba.

Aparentemente e posibilidad ta existi cu no ta solamente un persona lo ta envolvi, pero lo por tin varios cu lo a forma parti di e plan aki y nan tur lo wordo someti na un investigacion pa trata di saca afo con y for di ki temp a sluis asina hopi placa di impuesto for di e departamento.

E noticia di fraude a cay manera un bom den comunidad, ya cu hopi hende a keda babuca cu den un departamento asina, caminda nan tin cu controla entrada di tur hende, cu ta cobra impuesto riba practicamente tur cos, por tin espacio pa algo asina tuma lugar loke sin duda no ta laga un impresion positivo atras.

Ya caba tin envolvimento di Ministerio Publico cu ya a inicia cu e investigacion penal y cu na su turno a envolvi tambe Landsrecherche den e investigacion caminda hunto cu oficialnan halto di DIMP lo tin cu trece claridad den e caso di fraude aki y tuma paso contra di esnan envolvi.

Como cu nos no por haya informacion, ta keda nos pa specula.

Aki ta trata di un Hoofd Cashier, kende tabata haci su cosnan, pasobra no tin ningun clase di control. E dama envolvi ta di inicialnan L.T.M., pero persona aki tin mas di tres aña pasa el a worde manda cas caba, anto awor tin investigacion andando? L.T.M ta na cas for di algun tempo caba.