“Nos mester sigura entrada di tur pensionado”

Lider di partido AVP, Mike Eman hunto cu miembronan di fraccion Marlon Sneek, Richard Arends y Robert Candelaria, e efectua un bishita na SVb caminda a reuni cu miembronan di staf y Director di e Departamento, ir. Erwin Jacobs. Durante di e reunion aki, e delegacion di AVP a trata e tema di e fondo di pensioen di pensionado, pero tambe a discuti e formula cu SVb ta usa pa duna subisidio di salario na miles y miles di trahador.

Den un entrevista cu lider di AVP el a papia di algun di e puntonan di e reunion cu ta masha importante pa comunidad.

Mike Eman: “N’e momentonan aki tin 22 mil pensionado cu ta haya un pensioen di SVb. E ta un entrada sumamente necesario pa nos grandinan. Pero nos por a mira cu dor di e situacion economico di nos pais di e ultimo añanan, cu cada bes e presion riba e fondo di pensioen ta aumenta. E cantidad di hendenan cu ta bira mas grandi y haci uso di e pensioen tambe ta sigui crece.

Pareu cu esey por wak cu for di luna di maart di aña pasa, e caida dramatico den nos economia, a crea un situacion sumamente complica p’e fondo di pensioen cu SVb ta maneha. E situacion aki ta rekeri accion pa sigura e pensioen di tur e ciudadanonan cu ta depende di e entrada aki. Pa hopi di nan e ta nan unico entrada.”

SUBSIDIO DI HULANDA

Parti di e subsidio cu nos ta hayando for di Hulanda, ta bay pa yuda paga salarionan di trahadornan y otro parti di e subisidio cu nos ta haya di Hulanda ta bay pa subsidia e prima cu ta wordo paga pa garantisa cu nos pensionadonan tin nan pensioen tur luna.

Nos sa for di diferente informacion cu ta wordo bisa cu pa juni e aña aki, Aruba posibelmente no lo haya e subsidio di salario di Hulanda mas. Esey naturalmente lo pone un presion adicional riba e fondo di pensioen di SVb cu mester keda paga e 22 mil pensionadonan.

Mike Eman: “Partido AVP ta pensando adelanta con por tuma pasonan necesario pa garantisa cu nos pensionadonan ta keda haya nan pensioen. Nos ta haciendo e ehercicionan aki hunto cu SVb, dor di haya e cifranan mas actual cu nan tin, pa nos tambe por haci proyeccionnan. Nos a mira hopi bes, cu ora tin retonan financiero, ta busca e solucion den saco di nos conciudadanonan.

Den e caso aki lo ta den pensioen di nos grandinan. Esey ta algo cu absolutamente nos no kier pa pasa.”

SALVAGUARDIA E PENSIOEN DI NOS GRANDINAN

Gobernacion di signatura di AVP, semper a percura pa un bon pensioen pa nos grandinan. AVP t’e partido cu a redobla e pensioen di nos grandinan. AVP t’e partido cu a introduci e ‘reparatietoeslag’ pa duna mas forsa di compra na pensionadonan.

Y ta AVP a aumento e pensioen durante diferente gobernacion. Nos a haci reformanan den pasado cu tabata asina importante, cu awe e efectonan di e reformanan ey a haci cu e fondo di pensioen ta para riba su pia y hasta ta luchando pa supera un di e peor crisisnan cu Aruba a yega di conoce.

Mike Eman: “Pa AVP ta importante p’e fondo aki wordo salvaguardia y pesey nos ta haciendo e ehercionan aki pa garantisa cu nos grandinan lo keda cu nan pensioen. Ideanan cu tin n’e momentonan aki riba mesa, ta pa por yega na stabilisa e fondo y garantisa e durabilidad di e fondo di pensioen. Nos kier preveni cu ta bay den direccion di kita algo for di nos pensionadonan. Nos sa cu e gobernacion actual semper ta busca e solucion den e saco di nos conciudadanonan, esey ta un filosofia totalmente eroneo y contrario di loke AVP a haci semper.

Aworaki, un biaha mas, partido AVP ta haciendo ehercicionan pa preveni, cu tur loke nos ta mira cu ta bin p’e fondo di pensioen, no resulta den un reduccion di e pensioen di nos grandinan. Loke nos kier ta pa nos salvaguardia e pensioen di nos grandinan. Esey t’e parti hopi importante di e bishita cu nos a haci na SVb.”