SIWA no a haya razon den caso hudicial entama contra di WEB

E decision di Corte den e caso cu e sindicato di SIWA y otronan a cuminsa contra e compania no a duna resultado cu e trahadonan a spera. E decision ta bisa cu aunke e trahadornan tin derecho, mester pone den balans kico ta pisa mas: Interes di trahador of interes general?

P’e motibo ariba menciona, WEB no por a haci nada otro pa sigui aplica e reduccion di salario cu 12.6%. Tabata sindicatonan VWI y SIWA, cu ta representa trahadornan di WEB, a cuminsa procduranan legal contra e compania di awa , despues cu WEB a sigui cu e reduccion di salario di 12.6% den 2021, sin cu a yega na un palabracion cu e sindicato- y trahadornan prome. Pendiente di e veredicto aki tambe tabata e sindicato Alvast di ELMAR.

E reduccion di salario aplica, a wordo deposita door di WEB den e fondo di FASE, cu ta bay pa yuda esnan cu a perde nan trabou durante e pandemia di coronavirus. Manera por corda, aña pasa, e sindicatonan a firma un protocol cual tabata valido for di luna di mei, 2020 te cu 31 di december, 2020.

E pregunta cu mester a haci den e caso sumario cu e sindicatonan a cuminsa tabata si WEB tabatin otro opcion cu esun di reduci e salarionan cu 12.6%, despues cu Hulanda pa duna e di tres y di cuatro tranche di ayudo a pone como condicion cu pa tur e companianan estatal di Gobierno mester bin cu un reduccion di salario di 12.6% pa 2020.

Si Aruba mester a acepta e condicion di Hulanda of no, ta algo cu no por husga den un caso sumario. Corte simplemente ta bay for di e punto di bista di valides di e condicionnan.  Corte a dicidi cu WEB como un compania estatal, mester wordo mira como un empresa liga na Gobierno y por lo tanto ta cay bou di e condicion cu Hulanda a pone pa Aruba pa duna e di tres y di cuatro tranche di ayudo.

WEB (por medio di Utilities) ta complementa den mannan di pais Aruba y ta cumpli cu un tarea publico pa percura pa awa y coriente pa pueblo di Aruba. Contrario na otro compania- y empresarionan, como monopolista e tin menos consecuencianan di consecuencianan financiero y economico di e crisis di Covid-19. 

Awor cu Corte a dicidi cu e condicion poni dor di Hulanda ta valido pa WEB, e compania no por otro pa ehecuta e reduccion di salario cu 12.6% den 2021. Segun e hermentnan di Ley Laboral di Aruba, cu ta valido pa circunstancianan special manera e pandemia di Covid-19, ta conta, segun Corte, e acuerdonan laboral riba e punto aki y n’e momentonan aki, por wordo adapta temporalmente atrobe.

E interes di e trahadornan ta pisa hopi den e asunto aki, pero esun di WEB pa sigui cumpli cu e condicionan ta pisa hopi mas.

Den e protocol firma anteriormente den 2020, tin otro palabracionnan haci riba con e reduccion di salario cu 12.6% por wordo ehecuta, no a haci palabracion nobo. Hues a laga den man di e partidonan pa haci palabracion riba e punto aki.