“Who is fooling who”??

Candelario (Booshi) Wever a manda un carta na Prome Minister sra. mr. Evelyn Wever-Croes, relaciona cu e situacion na Sero Teishi. Como lider di UPP, Booshi Wever a dirigi su mes na Evelyn Wever-Croes, como Prome Minister, y alaves Minister encarga cu e cartera di Infrastructura y Medio Ambiente. Tambe el a manda un carta similar pa Presidente di Parlamento, Ady Thijsen.

Recientemente UPP a tuma nota di un situacion alarmante na Sero Teishi. A yega kehonan cerca nos tocante e gasnan toxico cu tabata molestia henter e bario, pa locual nos a haya ta oportuno pa nos mes bay mira kico ta pasando.

Durante nos recorido di e tereno, nos a tuma algun potret cu den nos concepto ta mustra con peligroso y urgente e situacion ta. Nos a vocifera nos preocupacion mediante un articulo den medionan di comunicacion.

Segun Booshi Wever pa su sorpresa UPP por a tuma nota den un matutino cu e compania Arcadis a haci un “survey” y ta yega n’e conclusion cu tur cos ta “koek en ei”! Den pasado ya caba UPP a publica potretnan cu ta mustra totalmente otro cos. No a pone liners e tempo ey. Te hasta e ex-Director di Serlimar, sr. Hensley Davelaar, a subraya esaki. Supuestamente lo a tuma medida, pero e tabata imposibel pa nos verifica esaki, pasobra nos a wordo prohibi e tempo ey pa subi e terenonan cu ta cay bou hurisdicion di Serlimar.

E potret cu nos ta manda adhunto ta saca siman pasa y den e relato di e matutino ta mustra potretnan cu ta imposibel pa sa si nan ta reciente of no, pero ta referi na un estudio haci na januari ultimo.

Pregunta e ora ta kico t’e situacion real na Sero Teishi? E potretnan ta mustra masha bunita, totalmente contrario n’e potretnan cu nos a saca siman pasa. E pregunta ta: “WHO IS FOOLING WHO”??

“Nos ta spera cu nos por haya un aclaracion riba henter e asunto aki. E situacion na Sero Teishi por wordo considera como un peliger eminente of no? E lo ta desavastador p’e habitantenan den e becindario si e gasnan causa un explosion. Esaki lo por tin consecuencia pa nos aeropuerto tambe y na final di cuenta pa nos turismo cu ya caba ta pasa dor di un temporada dificil.

Sin un eventual explosion mes, e situacion na Sero Teishi ya caba ta hopi dañino pa nos Medio Ambiente y p’e habitantenan di e bario cu ya caba ta sclama auxilio pa hopi tempo pa problemanan di salud cu defacto a sali publica den e raport di PAHO cu a wordo saca for di lachi cu e unico proposito pa haya mas placa pa Serlimar. Nos ta considera hopi straño cu ni DNM ni City Inspector, te asina leu cu nos sa, a hisa un “red flag” pa cu e situacion aki”, segun Booshi Wever.

Tambe UPP ta kere cu mester a busca un instancia imparcial pa colabora e “survey” cu e compania Arcadis a haci p’e beheerder di e tereno. Y asina kita tur posibel duda cu por ta existi pa cu e situacion na Sero Teishi.

Booshi Wever ta spera di por haya un aclaracion riba henter e asunto aki for di Premier Evelyn Wever-Croes y for di Ady Thijsen, Presidente di Parlamento.