Ayera BRA tabatin un simularco di Tsunami

Bureau Rampenbestrijding Aruba a informa AWEMainta tocante e training Regional di Tsunami, cu a tuma lugar ayera.

Caribe Wave ta un training cu ta trata e parti di Tsunami cual ta wordo organisa anualmente p’e region di Caribe completo.

Aruba a participa na tur e Caribe Wavenan cu a tuma lugar e ultimo añanan.

Pa 2021 Aruba su participacion tabata den forma di un funcional excercise. Comunidad mes no nota nada particular den e training Carib Wave 2021, relaciona cu Covid 19 Crisis, no a permiti un Full Scale Exercise pa evita algomeracion.

BRA a splica cu e training e biaha aki tabata pa midi e tempo cu a tuma pa pone tur e procesonan di e respectivo instancia den funcion p’asina yega na un bista di e cantidad di bida cu lo por wordo scapa den un caso di un Tsunami di e magnitud aki.

Tur esaki tabata via digital p’asina Bureau Rampenbestrijding Aruba por midi e capacidad di resistencia cu Aruba ta dispone di dje combina cu un pandemia activo.

Importante p’e publico tabata pa tuma nota tambe cu si durante e dia aki net ora di e training mester pasa un situacion real di Tsunami cu lo tabata un menasa pa Aurba, esaki a wordo informa mesora na publico cu esaki cu e informacion NO TA UN TRAINING, pero un situacion real.

Bureau Rampenbestrijding Aruba hunto cu Meteo Aruba ta gradici tur departamento pa na participacion. Pa finalisa ta spera cu e training aki lo por habri e dialogo na cas, scol, den comercio, organisacion etc. riba e topico di Tsunami pa con prepara bo/nos ta den un caso cu un eventual Tsunami presenta.

Nos tin nos plan? Kico pa haci? Kendenan nos por yuda?