PHILIPSBURG—Durante un seshon kòrtiku den sala di Korte di Hustisia na Sint Maarten diarazon mainta, Fiskal di Ministerio Publiko a pidi Korte pèrmit pa konfiská 17 mion dòler for di e èks Parlamentario Theodore Heyliger.
Segun Fiskal, esei te fortuna ku Heyliger a gana ku su aktividatnan ilegal. E suma eksakto ku Ministerio Publiko ke kita for di Heyliger ta $17,248,565.91 i NAf. 450,000.
Aña pasá Korte a haña Heyliger kulpabel di a tuma plaka bou di mesa serka e konsultent Hulandes Ronald Maasdam i e kontratista Windward Roads BV i di a laba 4 mion dòler dje suma.
El a haña un kastigu di 60 luna den prizon. Heyliger lo a risibi plaka bou di mesa pa aprobashon di varios proyekto grandi i e plaka ku ela risibi el a laba di forma ilegal. (No ku tin forma legal pa laba plaka).
E soborno ku el a haña ta 1,6 mion dòler i un krédito di 450,000 florin pa material pa traha su kas i un outo Dodge Charger ku bal $200,000.
Ademas el a tuma sèn bou di mesa serka un kompania di ‘bagger’ a rason di 700 mi dòler i regalunan a balor di $1,065,525 entre 2010 i 2014.
Ademas el a skonde sèn ku el a haña for di benta di dos tereno grandi na 2011 i 2009.
Pasobra mester a paga Heyliger plaka bou di mesa, e proyektonan a kosta gobiernu mas plaka.
E sistema pa kobra Heyliger tabata stail di stofzuiger kaminda nan a kobr’é sèn di otro krímennan ku nan no a menshoná.
Palabra awor a na su abogado Eldon Sulvaran, kende por reakshoná promé ku 9 di aprel. Hustisia a arestá Heyliger dia 19 di februari di 2019, pero a skòrs su detenshon dia 21 di mei pasobra el a bira malu.
