Habitantenan atraca y mara den nan cas diaranson anochi laat

Diaranson anochi algo prome cu mey anochi Polis a wordo manda cu urgencia Pagaaistraat (Madiki) unda un atraco a sosode.

Patruya serca di e adres cu ta un zijstraat di Driemasterstraat a yega hopi liher. Mesora nan a wordo splica kico tur a sosode y cu no t’e momento ey e atraco a sosode, pero basta rato prome.

Pues nos ta papiando di un atraco riba un cas unda cu e habitantenan a wordo mara segun nan propio version dor di tres atracador bisti na preto y tabata arma.

VERSION POLICIAL

For di Vocero Policial sr. Lito Lacle nos ricibi a siguiente informacio oficial: 

Algo prome cu mey anochi a tuma lugar un atraco na Pagaaistraat. Aki 3 hende homber papiando Spaño cu arma di candela a drenta un cas na Pagaaistraat y a atraca y mara e habitantenan den e cas. Te ainda no tin specifico kico nan por a bay cune.

Atraco Team a presenta n’e sitio, Polis Tecnico y tambe Team di Yudanza di Victima (slachtofferhulp). 

Pa Cuerpo Policial por resolve mas caso cooperacion y informacion di pueblo di Aruba ta hopi importante pesey nos ta pidi si bo tin cualkier informacion yama nos tiplijn: 11141. Nos ta garantisa cu bo ta keda anonimo.

OTRO VERSION

Tabata e bisiñanan den Pagaaistraat, cu a bati alarma pa un caso di atraco arma. Polis a yega mesora na e sitio y a bin haya un mama y su yiu muher mara den cas, na Pagaaistraat # 15.

E 3 hende hombernan di habla Spaño a drenta e cas, cu arma di candela den man, a mara nan y atraca e habitantenan den e cas. A horta un suma di placa bay cu ne, pero e cantidad no ta conoci ainda.

Bisiñanan a conta cu nan a mira un auto blanco bandona e sitio cu velocidad halto, indicando cu nan sospecho ta riba nan. E victimanan mes ta nobo den e bario, pues bisiñanan no conoce nan bon pa sa kende nan ta y kico nan ta haci cu lo a atrae atracadonan cerca nan.

Ta trata aki di un compleho di apartamento, di cual e habitantenan aki, di nacionalidad Peruano, pero biba na Venezuela, tabata cla pa biaha diadomingo awor.

Nan tabatin nan cen warda pa biaha cu ne. E mama tabata na telefon ora cu e atracadonan a drenta e apartamento pa horta nan pertenencia y nan placa. E gritonan di auxilio a activa esun cu e tabata papiando cu ne na telefon y e bisiñanan. A yama Polis pa nan pa avisa cu tin un atraco tumando lugar na dicho direccion.

E mama y su yiu a keda cu masha susto y a dicidi di bay pasa anochi otro caminda. E investigacion ta tumando lugar.