Otro atraco riba un famia cu ta bolbe demostra cu criminalidad ta sigui algo preocupante

Na diferente sitio riba e isla diarazon mainta, autoridadnan policial a tene control na varios punto pa controla ciudadanonan cu tabata bayendo trabou of hibando nan yiunan scol.

Un cantidad di multa a wordo reparti pa diferente violacion y den hopi e casonan aki, pa hendenan cu ya caba tin scarcedad di placa, pero di otro banda Gobierno tambe tin mester di placa.

E control aki a haya un otro nificacion den oranan lat di anochi, ora cu algun antisocial  a dicidi di drenta un cas den Oranjestad, mara un mama y su yiu muher pa despues busca placa den e cas y otro pertenencianan di balor, pa bay cu esakinan.

Pafo tabatin un auto sospechoso blanco c’un bisiña a mira staciona eynan y despues a bandona e sitio cu velocidad halto, pero te cu awe mainta ainda, no tabatin indicacion concreto ta hende e tiponan aki tabata.

Pues den dia Polisnan a tene control na varios sitio, pero den oranan di anochi pa falta di un control adecuado, e malandronan aki ta actua y por a mira cu e atraco aki a tuma lugar mey ora prome cu mey anochi, mey ora prome cu toque de queda a drenta na vigor.

Esaki ta duna e impersion cu e atraconan aki ta bon na altura den den e lapso di tempo ey, personal di Polis ta bezig ta atendiendo cu nan raportnan cu nan tin, bezig ta prepara pa cambio di warda y cu vigilancia policial na un momento asina ta masha limita.

Otro puntonan interesante den e caso peculiar aki, t’e hecho cu aki no ta trata di un famia cu ta comerciante of ta duna e impresion cu nan tin hopi placa den nan posecion.

Ta hendenan cu tabata cla pa biaha bek pa Peru  y mescos cu hopi otro hende cu a bin Aruba pa traha y spaar algo pa hiba nan pais bek, e hendenan aki tambe lo tabatin placa gespaar cu nan ta gana cu nan sodo haciendo diferente trabou y awor a perde tur cos aparentemente.

Sinembargo esey ta mustra tambe cu e grupo di malhechornan aki mester ta bon na altura di e situacion di e famia, cu nan tin placa den nan poder, dolars probablemente pa hiba nan pais y pa cual motibo nan a drenta y haci loke nan a haci.

Ta algo sumamente condenabel, algo di lamenta, pero sea hendenan yega nan e dos personanan aki, of conocirnan cu tabata na altura di nan biahe, lo a informa e malandronan cu a drenta den e cas pa horta e placa aki. Sinembargo ningun di e posibilidad aki ainda a wordo confirma, pero tur cos ta mustra den e direccion aki sin duda ya cu ta dificil pa kere cu e atracadornan aki a simplemente scoge un cas pa nan tira un para y ta bin haya dos hende cu tin placa gespaar pa nan horta.