Wardacosta a detene 14 indocumentado den awanan teritorial di Aruba

Diarazon anochi e sistema di radar di Wardacosta a detecta movecion di un boto biniendo direccion di Aruba. Mesora RCC a dirigi un patruya di Metal Shark di Wardacosta pa intercepta e boto.

E Metal Shark ta logra intercepta e boto ‘El JUNIOR’ procedente di Venezuela cu 14 indocumentado abordo, un rato despues den awanan territorial di Aruba.

Den bon cooperacion cu helicopter di Cuerpo Policial di Aruba a dirigi e boto pa Marinierskazerne Savaneta. E capitan y su ayudante a keda deteni y e resto di e tripulantenan a wordo traslada pa Warda nos Costa.

Un caso cu a demostra e bon colaboracion entre e partnernan encarga cu vigilancia di frontera.

Wardacosta lo sigui cu patruyanan intensivo riba lama y ta haña sosten di milicianan di Aruba tambe p’asina efectua vigilancia 24 ora pa dia durante 7 dia pa siman.

Alabes e patruyanan ta vigila y proteha e fronteranan di transportenan di droga, traficacion di hende y di arma. Na momento cu un habitante alerto mira un situacion sospechoso of peligroso riba lama, nan por yama Wardacosta riba e number 913. E number aki ta alcansabel di dia y anochi.