Tres atracador arma a drenta laundromat na San Barbola

Diahuebs anochi tabata mustra di bay ta un anochi keto, caya no tabata mucho druk.

Lamentablemente cu rond di 9:30 p.m informacion a drenta di un atraco arma na Super Clean Laundromat situa na San Barbola.

Tres atracador a drenta e negoshi di laundromat unda tabatin un dama y cabayero Chines laborando.

Segun e dama e atracadornan ta hende color scur y cu nan tabatin cuchiu y arma di candela cu nan.

E atracadornan a dal e dama Chines un wanta na su cabes y a baya cu un suma di placa y tambe un Iphone di e dama.

Segun e dama Chines e tres atracadornan a core bay direccion ex Codemsa.

Varios unidad di Polis a yega y mesora a cuminsa check rond, pero sin ningun resultado.

Atraco Team y BFTO a ser pidi na San Barbola. 

VERSION POLICIAL

Relaciona cu e caso aki, for di Vocero di Polis nos a haya e siguiente version. Pa 9.36 pm melding a drenta via Central di Polis cu 3 hende homber cu arma di candela y cu cuchieu a bay na Super Clean Laundromat na San Barbola y a atraca e persona trahando eynan y a bay cu mas o menos 1000 florin.

Atraco Team a presenta n’e sitio, Polis Tecnico y tambe Slachtofferhulp.

Pa Cuerpo Policial por resolve mas caso cooperacion y informacion di pueblo di Aruba ta hopi importante pesey nos ta pidi si bo tin cualkier informacion yama nos tiplijn: 11141. Nos ta garantisa cu bo ta keda anonimo.

MODUS OPERANDI

E anochi anterior tabatin e atraco den Pagaaistraat na Madiki. Aki tambe tabata trata di 3 persona, cu a drenta e cas y a bay cu tur pertenencia. E modus operandi ta casi mescos. Por ta trata aki di mesun 3 persona, kendenan ta cometiendo atraco? Ban yuda soluciona e atraco aki tambe.