A sigura di lo paga tur candela di dump den dos luna, pero nada di berdad

Ex Minister di Infrastructura Otmar Oduber durante di formacion di Gobierno di coalicion MEP-POR-RED, a sigura pueblo di Aruba y principalmente comunidad di Parkietenbos, cu den un lapso di dos luna, lo tin solucion pa dump y cu lo paga tur candela riba e deposito di sushi aki den corto tempo.

Otmar Oduber ya no ta Minister mas, Prome Minister Evelyn Wever Croes a keda encarga cu asuntonan di dump despues cu mesun Gobierno aki, a dicidi di core cu e sucesor di e ex lider di POR, drs. Marisol Lopez Tromp, ora cu e ultimo aki a bin divulga manehonan duduso cu a tuma lugar den e ministerio aki y cantidad di iregularidad cu a tuma lugar.

Prome Minister tambe a sigura hendenan den e bario di Parkietenbos cu e lo sinta dialioga cu hendenan den e bario pa yega na un solucion, pero faltando algun luna solamente cu e por goberna, no tin solucion na bista y e candelanan riba dump ta parce manera e tipo di “vlam eterno” cu ta sende ora cu recorda heroenan di pasado cu a logra hopi pa nan pais.

Nunca el a paga, nunca a soluciona e asunto aki y ainda no tin solucion pa dump, mientras cu investigacion cu mester a tuma lugar riba e encinerator, tampoco tin claridad ariba mescos cu varios otro contract cu a wordo firma pa cierto trabou, pero cualnan tabata sumamente sospechoso.

Cu expulsion di Marisol Lopez Tromp for di Gobierno, for di maneho di e Ministerio di Infrastructura, tur asunto dudoso a drenta un tipo di doofpot riba cual a pone un tipo di tapadera cu ta sumamente pisa y dificil pa lanta por lo pronto.

Nada, pero absolutamente nada di loke ex Minister Marisol a presenta den reunion publico di Parlamento riba maneho di su ex colega, ta ser menciona ningun caminda ya cu tin un silencio hermetico riba e asunto aki.

Esnan cu a spera cu Prome Minister Evelyn Wever Croes, kende a sigura pueblo na 2017 ora cu el a huramenta como Prome Minister, cu su Gobierno lo goberna cu reglanan di integridad y transparencia, lo a sigui cu e investigacion y cu su persona lo a trece claridad riba tur denuncia haci pa ex Minister Marisol, pa di tantisimo bes ta keda hopi decepciona.

Ayera mainta dump na Parkietenbos a bolbe lanta den vlam, a bolbe saca huma preto y shinishi, a bolbe molestia hendenan den e bario cu holor stiniki ya cu e Gobierno cu e priminti solucion pa e cosnan aki, simplemente ta bolbe defrauda.

Desde cu e cambio di Minister Marisol ningun hende sa kico t’e maneho nobo di Gabinete Wever Croes, kico lo bay sosode, con lo soluciona e problema y henter e asunto di e dump aki pero poco poco tin cierto señal cu ta dunando cierto indicacion cu e maneho ta bayendo bek p’e era prome cu drs Marisol Lopez Tromp a tuma over.

Minister President t’asina envolvi den e su campaña politico usando e pandemia como recurso politico, cu ta mustra cu e no tin tempo pa fiha un maneho p’e tipo di problemanan aki y hopi den e bario ta sinti cu nan ta ser manda di cashi pa muraya sin cu tin solucion na bista.