ATA a lansa ‘La Felicidad Extendida’ na Latino America

Dia 20 di maart awor ta celebra internacionalmente e ‘Dia di Felicidad’ y pa medio di un campaña specifico p’e mercado di Latino America, Aruba Tourism Authority a tuma e oportunidad pa celebra esaki durante e luna aki cu e campaña yama “La Felicidad Extendida”.

E promocion pa cu esaki a inicia dia 8 di maart y lo sigui pa full e luna te cu 31 di maart. E programa ta duna diferente beneficio n’e diferente segmento, manera pareha, grupo di amigo y tambe famia.

Cu participacion di diferente socio manera AHATA, aerolinea, operadornan di tour, actividadnan entre otro, ATA por a realisa e campaña aki. Lo ofrece descuento tanto di hotel, pero tambe di aerolinea y mucho mas. E consumidor cu ta desea di biaha pa Aruba y probecha di e campaña por mira y cumpra tur e ofertanan aki riba aruba.com.

E mensahe di e ofertanan ta cu Aruba ta celebra e fecha internacional di felicidad no solamente riba e dia mes cu ta dia 20 di maart, pero cu ta celebra esaki durante full e luna.

Pa tal motibo e mercado turistico di Latino America a wordo sorprendi ya caba cu 30 diferente oferta di hotel, restaurant, actividadnan y tarifanan special ofreci dor di e aerolineanan cu ta bula den e region.

Expectativa p’e campaña aki ta halto y ya mas cu 5000 persona a registra pa disfruta di e oferta special.

Latino America ta un mercado importante pa Aruba: Na 2019 e continente aki tabata conta pa 9.5% di e total di turismo pa Aruba. Debi n’e pandemia y ceramento di nos fronteranan, na 2020 e continente aki a trece 4.8% di e total di turismo pa Aruba. P’e prome dos lunanan di 2021, Latino America a trece 4.8% di e total di bishitantenan pa nos destinacion.

E Dia Internacional di Felicidad mes cu ta dia 20 di maart lo lansa un video cu a wordo produci na Aruba. P’e video aki a busca na diferente hotel e bishitantenan di Latino America pa sorprende e pareha, famia of e grupo di amistad cu un extended stay na Aruba. Ademas nan a wordo ofreci algun regalo mas cu ATA y socionan a facilita p’e bunita momento aki.

Un di e ganadornan di e extended stay a invita su novia pa un biahe di sorpresa y na aeropuerto na Colombia su pareha a haya sa cu nan ta bay Aruba. Ora nan a yega Aruba nan tur dos a haya e sorpresa cu pa medio di e campaña special aki nan estadia a wordo prolonga cu dos anochi mas! Aki e guy riba su turno a dicidi pa bolbe sorpresa su pareha y riba e anochi di nan extended stay el a pidi su novia su man pa casamento. Naturalmente no a laga e oportunidad pasa pa graba e momento di felicidad aki!

Aruba Tourism Authority ta gradici tur socio cu a acepta e programa special aki cu sigur lo yuda pa incentiva e biahero di Latino America pa scoge Aruba como nan destinacion pa pasa nan vacacion.