Encuentro publico historico awe dialuna den Parlamento riba desaroyo di Pariba di Brug

Parlamentario Alan Howell, lider di POR ta sumamente contento di por anuncia cu awe dialuna pa 9or di mainta lo bay tin un encuentro publico historico den Parlamento pa trata cu tur Minister riba desaroyo di Pariba di Brug.

E ta bisa cu no tin hopi politico cu ta interesa pa lucha pa Pariba di Brug y San Nicolas su hendenan y bienestar, pero ora di eleccion, nan ta yega na boshi si.

“Mi a logra pa prome biaha den historia politico un encuentro publico den Parlamento pa tur Minister bin duna cuenta ki tin pa Pariba di Brug prome cu eleccion. Intencion ta pa cada Minister informa riba cada un di nan cartera kico nan tin den tapara di awor pa eleccion pa Pariba di Brug, ki dia e proyectonan lo cuminsa y ki dia e proyectonan lo termina. Mi tin un cantidad di pregunta pa cada Minister”, Howell a indica.

Manera ta conoci, Alan Howell for di prome momento a bin ta boga pa logra proyectonan pa San Nicolas y Pariba di Brug en general y awor cu pa prome biaha den historia ta logra un encuentro publico den Parlamento pa atende cu tur Minister riba e proyectonan pa pariba, e ta demostra un biaha mas e amor y deseo di logra cosnan grandi pa Pariba di Brug y su hendenan.

Na final Howell a gradici Presidente di Parlamento, ADy Thijsen pa honra su peticion y yama e encuentro publico.