Homber cu a mata su famia por sali liber pa bon comportacion pero no tin ayudo of institucion pa tum’e over

Dia 4 di april di 2008, comunidad completo di Aruba a wordo sacudi pa un caso di asesinato cruel cu a sosode na Santa Cruz, caminda un homber di 29 aña, a mata su mama y tata y tambe un ruman nomber di dje, den cas di e famia na Macuarima.

Tabata trata di e homber Eugene Lampe cu tempo di e crimen tabatin 29 aña y e mainta fatal aki el a drenta e cas y a mata su tata Juan di 60 aña, su mama Ina di 57 aña y su ruman homber Edvard di 30 aña, algo cu a conmove henter comunidad p’e forma horendo con e asesinatonan a tuma lugar.

Durante tratamento di e caso den Corte di Prome Instancia, a impone un castigo di 18 aña di prison contra di Eugene loke Ministerio Publico no a haya ta bon ya cu tur raport tabata mustra cu e persona aki lo ta capas di bolbe haci mesun cos aki ora cu e bay ben den sociedad, loke a pone cu Ministerio Publico a apela e sentencia.

Den HOF e decision aki enberdad a wordo cambia y aki Ministerio Publico a mira cu a aumenta e castigo p’e asesino aki cu dos aña mas, pues el a ricibi un castigo di prison di 20 aña, pero mescos cu Corte den Prome Instancia, tampoco HOF a bay di acuerdo pa duna e homber aki TBS, esta cu e tin cu keda cera den un instituto pa resto di su bida despues cu e sinta su castigo, ya cu no tin un centro asina aki na Aruba.

Informacion cu AWEMainta ta dispone di dje ta dentro di poco Eugene Lampe lo por bin na remarca pa libertad condicional mirando cu ya e ta cerca di cumpli dos tercera parti di su castigo di 20 aña y segun informacion tin preocupacion reinante kico lo bay pasa ora cu e momento aki yega, mirando cu comportacion di Eugene ta uno hopi ehemplar den KIA, caminda e ta trahando den biblioteca di e instituto coreccional.

Na Aruba no tin institucion pa tuma un hende den e estado mental aki over, caminda durante tratamento di e caso a keda constata cu e ta sufri di ‘schizophrenia’ cual no por wordo trata aki na Aruba.

Su periodo p’e bin na remarca pa haya libertad condicional ta yegando y e persona aki tin derecho pa wordo considera p’esaki, pero e temor ta existi riba kico su comportacion lo bira una bes cu e ta bek liber den comunidad.

Un di e declaracionnan cu Lampe a duna durante tratamento di e caso di asesinato na Hues tabata cu el a comete e acto aki, ya cu e tabata pa wordo poni bou curatela y e no tabata kier esaki, loke a pone cu el a mata su tata c’un golpi fuerte c’un pida biga tras di su cabes y el a haci mesun cos cu su ruman kende tabata drumi n’e momento cu el a wordo asesina.

Pues autoridadnan tin cu busca un solucion p’e persona aki, caminda no ta sigur cu lo por mande pa Hulanda of un otro caminda pa despues cu e recobra su libertad condicional, e sigui bou vigilancia y tratamento continuo manera ta sosodiendo awor caba na KIA.

Ni su famia, no kier’e serca nan. Mande Hulanda awor, lo costa Gobierno hopi placa, y Hulanda tampoco ta interesa. Minister di Husticia, Andin Bikker ta bon na altura di e caso aki, pero e mes no sa kico pa haci.