Kaso kontra Alcalá Wallé a kaba na aros i koko

WILLEMSTAD – Diabierna mèrdia Hues señora mr. G. Edelenbosch diktando e sentensia den e kaso di eks Minister señora Marilyn Alcalá Wallé a konkluí ku e señora aki dia 15 di mei 2017 a aktua kontra di e Landsverordening ku ta atendé ku stipulashon di integridat di kandidatonan pa bira Minister.

Esaki Marilyn Alcalá Wallé a hasi dor di no a raportá tur e funshonnan i trabounan ku e tabatin (Presidente di Marilyn Alcala Foundation, Road Runner Club i Alcala CQI Medische Praktijk N.V.), anto tampoko duna aspektonan relashoná ku fortunanan ku e ta disponé di dje.

E señora a keda sin menshoná 4 kuentanan di banko (den kaso di ACU esei no tabata na nodi), komo tal ta papia di falsifikashon di dokumento. Dor di no a duna e informashonnan aki señora Marilyn Alcalá Wallé a faya di duna Formador e material nesesario pa por husga riba su integridat i òf posibilidat pa kubri interesnan kontradiktorio.

Pero Corte no a konkluí ku aki ta trata di aktonan ku mal intenshon i òf ku benefisionan personal, anto tampoko por konkluí ku tabatin aktividatnan empresarial.

Den e veredikto ta splika ku e abogadonan a basa riba vários punto pa deklará ku e akusashonnan kontra Marilyn Alcalá Wallé no ta atmisibel.

Pa kuminsá tabatin e punto ku segun e abogadonan e reglanan konektá na e lei di screening no tin un base hurídiko. Ministerio Públiko segun e abogadonan no ta aktua a base di igualdat i ta falta ku e prinsipio di konfiabilidat, komo tal por papia di un aktitut arbitrario den e desishon di pèrsekushon di parti di Ministerio Públiko. E desishon segun e abogadonan ta influensiá pa rasonnan polítiko.

Ademas a surpasá e tèrmino rasonabel, anto a faya ku preskripshonnan penal. Corte no a duna e abogadonan rason riba e puntonan ariba menshoná ku e defensa a hiba.

Corte finalmente ta haña ku Marilyn Alcalá Wallé no mester keda kastigá, lokenan a pasa ku e señora aki, por ehèmpel su retiro komo Minister mes tabatin un impakto asina grandi riba su bida familiar i di su famianan. Ademas t’e Promé Minister ku a hañ’é den un tipo di kaso asina ku a hala atenshon amplio den opinion públiko, Hues señora mr. G. Edelenbos a kontinuá su splikashon.

Manera den tur kaso di Corte, sea penal of sivil, e dos bandanan tin dos siman pa disidi si nan ta apelá e veredikto di Hues.