Minister Andin Bikker y APFA ta firma acuerdo pa desaroya un Centro nobo pa KPA den area di Oranjestad

Diabierna atardi Minister Andin Bikker y Stichting Algemeen Pensioenfonds Aruba (APFA), representa pa Directornan sra. Sheila van Veen y sr. Erik Goris, a firma un acuerdo di principio pa bay desaroya un Centro Policial nobo pa Cuerpo Policial di Aruba (KPA) den area di Oranjestad. Ya pa basta aña caba KPA y Sindicato SPA a bin ta expresa e deseo pa haya centronan nobo pa KPA entre otro den e area di Oranjestad.

Minister Andin Bikker a duna oido n’esaki y na 2019 a logra muda cierto departamento cu antes tabata na Frankrijkstraat pa un edificio mas nobo y amplio situa na Wayaca, completamente adapta n’e deseonan di KPA. Tambe a establece e departamento di ‘Tourism Oriented Policing and Security’ (TOPS) n’e edificio di Arubus riba L.G. Smith Boulevard, pues central den e shopping area di turismo crusero.

Den cuadro di e esfuerso pa por sigui aloca mas departamento di KPA den edificionan mas central y moderno, adapta specificamente n’e deseonan di KPA, Minister Andin Bikker a firma un acuerdo di principio cu APFA, pa hunto bay explora e posibilidadnan pa cu sea edificonanan existente of desaroya uno nobo.

Den e cuadro ey ya identifica un edificio cu tin preferencia di KPA y Sindicato SPA na un area hopi central, y APFA a encamina un proceso den un esfuerso concreto pa por adkeri esaki y bay adapte n’e deseonan di KPA.

Como e fondo di pensioen mas grandi na Aruba di empleadonan publico, empleadonan di companianan di Gobierno y institutonan subsidia dor di Gobierno, APFA ta un partner logico y ideal no solamente p’e proyecto aki, pero tambe pa mas proyectonan di Gobierno den futuro, ya cu e inversion ta bay na beneficio di e fondo di pensioen, pa por sigui reenforsa e base solido di pensioen di empleadonan publico y di tur otro entidad pa cual APFA ta encarga cu e maneho fondonan di pensioen.