No yena vacatura di hende cu a bay cu VUT cu trahador nobo dilanti eleccion

Arubahuis ta un organisacion importante pa Aruba y awor cu Aruba ta den un situacion nobo y delicado cu Hulanda, AVP ta kere cu e rol di un Arubahuis fuerte, ta mas importante cu nunca, ta loke Parlamentario Robert Candelaria di fraccion di AVP a trece dilanti den conferencia di prensa.

“Meta primordial di Cas di Aruba na Den Haag ta pa representa Gobierno di Aruba na Hulanda, conforme nos Statuut, caminda nan t’e punto di contacto na Hulanda pa Parlamento, Conseho di Ministro, departamentonan di Gobierno y tambe e pueblo Arubiano.

Nan mester “behartig de belangen van Aruba, zowel in Nederland als bij de Europese Unie en de verlening van steun en bijstand aan Arubanen in Nederland”.

Nos a tuma nota cu e Minister Plenipotenciario a declara na januari ultimo cu lo tin cambionan den Arubahuis y relaciona cu esey AVP tin algun pregunta: E Minister ta bisa cu awor pa via di COHO mester cambia e dinamica di Arubahuis, pero e mesun Minister aki tabata bisa cu mester cambia e organisacion p’e ta menos administrativo, desde cu el a tuma over na Den Haag.

Ta manera cu tur Minister di e gobiernacion actual, awor na final di nan tempo den Gobierno a realisa cu mester haci algo, prome cu nan bay cas. Nos a compronde den e declaracion di e Minister Plenipotenciario cu diferente trahador di Cas di Aruba, pronto lo ta bayendo cu VUT of pensioen.

Mirando cu un di e exigencianan di Hulanda ta pa baha gasto di personal, nos ta pensa cu esaki ta un bon oportunidad pa haci ahuste den e trabounan y reparti esaki bou e personal cu ta keda y sigurno bolbe yena e organisacion cu hende. Ta importante p’e Minister purba cumpli cu loke el a bisa y reduci gastonan operacional, optimalisa servicio, na lugar di anuncia cu tin vacatura djis paso ta aña di eleccion,” Parlamentario Robert Candelaria a declara.