Awe a tuma un paso mas den e era nobo pa Cuerpo Policial

“E no tabata facil. Ta un esfuerso sobre humano a tuma lugar aki pa aloca fondo mey-mey di e pandemia, pa sigura cu Polisnan tin mas y mihor ekipo pa por brinda seguridad riba nos isla. Uniform nobo y practico ta un di nan”, asina Minister mr. Andin Bikker a anuncia ayera mainta durante presentacion di e uniformnan operacional pa Cuerpo Policial Aruba. 

Durante un ceremonia cortico na Centro di Husticia na Macuarima, e mandatario encarga cu maneho di husticia na Aruba a presencia presentacion di e uniform nobo pa Polis. Ta un proyecto cu tin algun aña caba andando, pero cu nunca a concretisa, debi na falta di un maneho practico y di a aloca fondo pa cumpra e uniformnan. 

Minister mr. Andin Bikker ta corda ainda ora el a asumi e funcion di Minister di Husticia na 2017, ya tabatin varios concepto di diseñonan, pero no tabatin un decision. El a subraya rol di e Sindicato di Polis, SPA, cu aña pasa, durante e retonan rond di e pandemia, a enfoca hopi riba cambio di uniform operacional. 

Den e ultimo añanan a bin varios variante den e uniform di Polis. Asina a traha uniform p’esnan riba motorcycle, den boto di Polis, na beach y asina por sigui menciona. Dado momento Polis tabata presenta den varios diseño y color. Cu e cambio aki awor lo tin un solo uniform operacional y tur departamento lo uz’e. 

Mester menciona cu nunca a formalisa e variantenan di e uniform di Polis. Pues pa ley y den reglamentonan, t’e uniform tradicional so ta vigente. P’esey Minister Bikker awor ta kedando cla cu e adaptacionnan den ley y reglamentonan pa reconoce y formalisa uzo di e uniform operacional den practica. 

“Awe ta un dia historico. Un etapa nobo ta cuminsa awe pa Polis. E mesun etapa cu nos a cuminsa tambe algun tempo atras caba pa Cuerpo di Bombero y Guarda nos Costa ora a introduci uniform nobo pa nan”, di acuerdo cu Minister Bikker. Pa Polis e reto tabata poco mas grandi, pasobra tin mas di 600 empleado den e cuerpo, pues e presupuesto mara na cumpramento di e uniformnan aki ta mas grandi. 

Minister Andin Bikker ta contento di e avancenan cu ta nota e ultimo añanan den Cuerpo di Polis. Sin conta e uniformnan nobo, a percura pa un flota nobo y grandi di auto, a trece e helicopter bek, a cumpra bromer nobo pa Polis, radar nobo pa control di costa, a percura pa oficinanan nobo pa varios departamento, a pone wifi na wardanan di Polis, a indexeer e balor maaltijdbonnen, a sera acuerdo di ICT cu Hulanda pa software y hardware special pa Polis, a renoba Scol di Polis, a firma protocol pa seguro digital, a introduci examen di digital y un rijbewijs nobo, y awor ta den fase final di negociacion pa pronto yega na un centro di husticia grandi y moderno pa Oranjestad.