Catalogo di Pintura Indjan riba Baranca a yega tur Scol

A pesar di e retonan di Covid-19, Fundacion 1403 cu sosten di sr. Francisco Croes y Museo Arqueologico Nacional Aruba (MANA) a finalisa e reparticion di e Catalogo di Pintura Indjan riba Baranca pa tur scol, universidad y instancianan cu ta maneha y cuida nos herencia cultural y natural.

Un total di 66 scol a ricibi e buki pa docente y alumno por haya informacion y inspira nan mes cu e parti mas antiguo di nos herencia cultural aki. Ademas di scol a entrega un ehemplar di e catalogo na instancianan manera Biblioteca Nacional, Parke Nacional y Archivo Nacional.

Na final di 2019 a lansa e proyecto pa regala biblioteca di tur scol un catalogo. Pa cada persona cu a cumpra e publicacion sea na un libreria of na MANA, Fundacion 1403 a regala un scol, un buki den nan nomber. E community partnership project aki a ser desaroya den e spirito di e Sustainable Development Goals (SDG’s) di Nacionan Uni

E publicacion y e proyecto Catalogo di Pintura Indjan ta bay Scol tabata tin un tremendo acogida y Fundacion 1403 ta contento y agradecido p’esaki.

E catalogo ainda ta disponibel na librerianan local y na MANA. E publicacion di e catalogo ta un proyecto cu a ser financia pa Prins Bernhard Cultuurfonds Caribisch Gebied, UNOCA, Representacion di Hulanda na Aruba y pa Comunidad di Aruba cu a cumpra e buki.