Daphne Lejuez yuda baha Minister Lampe y despues asumi cartera di enseñansa

E problemanan cu tin den enseñansa na Aruba no a caba y lo sigui dianan sigur hopi dificil y problematico te na ora cu Rudy Lampe sigui como titular di e ministerio aki.

Siman pasa tabata Minister Presidente Evelyn Wever Croes, kende a intermedia y alivia e presion cu tabatin na Emmaschool, pero practicamente tur hende ta kere cu e asunto no a wordo soluciona cu e decision of participacion cu Prome Minister a duna.

Ta spera cu Lampe cu legalmente tin tur ley na su banda, lo sigui cu su empeño pa muda Paso Sigur pa Emmaschool dentro di algun siman y impone su cambionan cu el a bisa cu e kier mira sin cu Prome Minister of e tres fraccionnan cu ta sostene Gobierno, por haci algo contra di esaki.

Hopi ta kere den e mundo di enseñansa cu problemanan cu a surgi bou di maneho di Rudy Lampe como Minister di Enseñansa, lo continua y e unico solucion pa alivia e asunto aki, ta retiro di Rudy Lampe como Minister.

Ya caba Gabinete Wever Croes a manda un Minister cas den persona di Marisol Lopez Tromp,  pero den e caso di Rudy Lampe, Evelyn no por manda carta pa Gobernador pa mustra cu ningun hende lo kier sigui traha cu Rudy Lampe, ya cu e ora Ricardo Croes den Parlamento lo kita sosten di Gobierno y Gabinete Wever Croes lo por bay cas.

Esey t’e punto mas dificil di henter e situacion, caminda cueste loke cueste lo tin cu permiti Rudy Lampe haci su cosnan ya cu di otro banda lo no tin Gobierno mas y e situacion lo bira politicamente ainda mas dificil p’e partido mas grandi den e coalicion, cu ta partido MEP.

Entre otro den fin di siman a surgi e pensamento cu pa atende y soluciona e situacion den enseñansa, e miembro di Parlamento independiente, Daphne Lejuez lo por hunga un rol cardinal pa soluciona e asunto aki, ya cu e tin un asiento na su disposicion cu lo por yuda na cubri e salida di partido RED for di coalicion.

Daphne hasta lo por asigna un experto cu e ta kere den su capacidad pa asumi responsabilidad como Minister di Enseñansa caminda pa algun tempo pueblo y maestronan por ta den trankilidad atrobe sin presencia di Minister Rudy Lampe mas.

Lo no ta consehabel pa Daphne mes bira Minister ya cu e ora e lo perde tur poder cu e tin actualmente como Parlamentario independiente pues lo ta mas na su lugar p’e nombra un persona di su circulo pa carga e cartera aki pa tres pa cuater luna.

Un situacion complica pero den e intrankilidad grandi cu tin n’e momentonan aki ocasiona p’e Minister di RED, algo asina sin duda lo percura pa hopi trankilidad cerca maestronan y caminda nan lo haya un hende cu ta respeta dialogo y opinion di maestronan.