Den estado critico turista cu apenas 2 dia na Aruba a wordo transporta urgente pa Hospital

Dialuna merdia den careda di 3’or, informacion a drenta di un otro accidente cu UTV riba e caminda di Natural Bridge. E biaha aki tabata papia di un accidente hopi serio.

Na yegada por a mira un grupo di turista para rond di un homber drumi di banda riba parti di e dak cu lo ta di e UTV. E homber aki hunto cu un amigo tabata den e UTV, momento cu nan a bolter.

E victima tabata bou sanger, debi na un trauma cu el a ricibi banda robes di su cabes. N’e sitio nos di AWEMainta a papia cu e turistanan y e otro ocupante.

Segun e ocupante, “We we’re playing”. El a sigui bisa cu nan lo tabata biniendo di pariba y den un bocht nan a perde control, unda cu e UTV a bay cay mas o menos 2 meter mas abou.

Algun turista pasando eybanda mesora a baha y a bay yuda, posiblemente nan a pone e victima riba e dak, wardando ambulance. Tur esnan cu a yuda tabata bou sanger di e turista masculino.

Di leu por a mira Polis di Trafico y ambulance su tras yegando.

Dado momento adrenalina den curpa di e victima a pone lanta sinta, pero visiblemente por a mira un trauma serio n’e parti robes di su cabes. 

Paramediconan na yegada mesora a mira cu ta algo hopi serio, y asina mes e turista a trata na subi riba e stretcher, pa despues nan sali cu urgencia cu ne den estada critico direccion Hospital. 

Un di dos Ambulance a yega pa trata e otro cu tabata na sanger, pero no di dje, pero di su amigo.

E cabayeronan aki tin dos dia na Aruba y ta biba na Estados Unidos, pero ambos ta procedente di Israel.