DNM a participa virtualmente n’e reunionnan Regional di UNEP relaciona cu e protocolnan LBS y SPAW

Directie Natuur en Milieu (DNM) como miembro di United Nations Environment Program (UNEP) di e seccion Caribbean Environment Program ta participa den forma virtual dianan 15 te cu 19 di maart n’e reunionnan relaciona cu e parti tecnico y cientifico di e ‘Land-Based Sources of Pollution,’ (LBS) y ‘Specially Protected Areas of Wildlife,’ (SPAW).

LBS ta trata e topiconan cu tin di haber cu sushedad y polucion en general riba tera. SPAW ta trata cu e especie y aeranan protegi cu bida salvahe.

Na aña 1999 e prome reunion y firmamento di e LBS protocol a a tuma lugar, anto aki na Aruba mes. Pero, e no a drenta na vigor di biaha sino te 2010 y el a forma parti di e 3 protocolnan di e Cartagena Convention. Den e instrumento legal aki (LBS) tin stipula e puntonan cu mester cumpli cune pa reduci e impacto negativo cu e ‘Land-Based Pollution’ den e area grandi di Caribe (Wider Caribbean) por tin pa nos medio ambiente y ser humano.

Den e LBS ta trata topiconan cu ta toca polucion, manera desperdicio di awa sushi y resto di kimico manera insecticida, emisionnan di p.e. motornan y industria den medio ambiente. Tambe ta trata otro asuntonan di informacion tecnico y scientifico manera investigacion y monitoreo di e efectonan di e LBS tambe. Dicon?

E area di lama di Caribe ta un recurso natural cu ta importante pa nos economia di turismo, pesca y recreacion pa nos mes hendenan tambe. Ta remarcabel pa menciona cu Aruba falta pa ratifica e LBS protocol den nos leynan local.

Locual si Aruba ta forma parti activo di dje, cu derecho di votacion, t’e reunionn y decisionnan relaciona cu e SPAW. Esaki t’e convenio pa proteccion y desaroyo di e medio ambiente marino p’e region di ‘Wider Caribbean’, manera stipula den e Cartagena Convention na 1983. E t’e unico tratado di e region di Caribe cu ta para pa proteccion ambiental di ecosistema di lama y costa.

Promoviendo cooperacion regional y desaroyo sostenibel di e recursonan natural cu tin di haber cu e areanan na costa y bida marino. Na 1990 e miembronan di e Cartagena Convention a adopta e protocol cu ta concerni e ‘Specially Protected Areas and Wildlife’ (SPAW). Esaki t’e acuerdo regional pa maneha y conserva  biodiversidad den area di Caribe.

E SPAW protocol a bira un ley internacional na juni 2000. Un di e stipulacionnan di e tratado ta specifica, nacionalmente of regionalmente, e medidanan di cooperacion pa proteccion di e especienan di bestia y mata. Pero e tratado tambe ta extende n’e establecimento di e areanan di proteccion y e areanan yama Bufferzones.

Un bufferzone ta un area unda no ta aplica regla y medidanan na un manera streng. Den e zona aki, Bufferzone, por haci estudio riba ki impacto cierto comportacion(nan) tin riba nos medio ambiente. Tambe por midi e tempo cu e ta tuma pa wak resultado di e comportacion riba nos medio ambiente. Sea e tabata un comportacion positivo of uno negativo.

Cu e splicacion aki di e protocolnan y tambe e participacion di DNM n’e reunionnan virtual ta duna mas claridad pa loke ta trata e topiconan critico relaciona cu e maneho di sushedad den area di Caribe.  Aruba ta parti di Caribe y di UNEP, asina nos ta forma parti di proteccion di e ecosistema riba tera y lama cu ta na beneficio di naturalesa y medio ambiente en general. Formando parti di e reunionnan nos ta haya hopi informacion di investigacionnan cientifico y tecnico cu hopi biaha ta imposibel pa logra esaki como pais individual. Si ta desea di haya mas informacion con tur esaki ta hinca den otro via video presentacion por bay riba Youtube: (175) Cartagena Convention Secretariat Video Presentation – YouTube. Bishita nos website www.dnmaruba.org pa e link directo.