Fiskal a demandá 8 aña kastigu di prizon pa duo atrakador

WILLEMSTAD – Mathshir Laken di 29 aña di edat i Joel Adriana tambe di 29 aña di edat tabata den sala di Corte djabièrnè último pa responsabilisá pa aktonan kastigabel ku nan a kometé dia 22 di  ougùstùs 2020.

Ta trata aki di un atrako armá riba un siudadano di inisial M.R pa a kita for di dje 1 telefon mobil IPhone Apple, 1 par di renchi di oro di orea pa ‘hende hòmber’.

N’e okashon aki a saka arma di kandela pa M.R bisando: “Si bo no tin sèn awor aki, mi ta tirabu, laga mi wak den e tas ei. Bo mester tin sèn”. Drentando kas di M.R via porta patras a oblig’é pa entregá tas ku kontenido. Komo tal ta trata aki di ladronisia violento, pero tambe poseshon di arma di kandela.

Abogadonan enkargá ku e defensa tabata mr. M. Gomes p’e akusado Mathshir Laken i mr. J. Prevo pa Joel Adiana.

Abogado señora mr. M. Gomes a defendé e punto di bista ku su kliente Mathsir Laken no a kometé ningun akto kastigabel, pasobra segun e abogado t’e víktima M.R. mes lo a duna Mathsir Laken e telefon, tanten ku e tin un debe serka dje.

Ta dos persona ta papia aki di e ladronisia di telefon, esta e víktima M.R. i su frei.

Pero segun abogado mr. Gomes no mester konfia deklarashonnan di M.R, pasobra esaki a hasi diferente deklarashon na Polisnan, pasobra apart di denunsia di telefon i renchi di oro.

E viktima a pretendé ku a trata na kita for di dje su oloshi i brel tambe, anto hasta su kamisa e duo kier a kita for di dje.

Mas aleu a bin padilanti un relato ku ta mustra ku M.R. tabata den e situashon ku e por a kore bai ya ku nan tabata pará pafó, of te hasta hasi denunsia na Polis, enfin un historia kasi ineksplikabel i inkomprendibel segun abogado mr Gomes.

Mas aleu segun e abogado kasi mester konkluí komosifuera un kombersashon tabatin entre Mathsir Laken i M.R i nada di atrako i òf menasa.

Abogado mr. Prevo enkarga ku e defensa di Adriana Willems a referí n’e hecho ku M.R. lo tabatin un debe serka su kliente esta Adriana Willems i ku finalmente riba esei a surgi e problema ku masha bai bini den intentonan pa fia plaka pa paga bèk.

Den sala di Corte e deklarashonnan a kue buèltanan straño ku a bira práktikamente inkomprendibel. Ámbos abogado a ekspresá duda serio den e komportashon i aktitut di M.R. pa mustra ku e no tabata bou di ningun menasa ku arma di kandela ya ku el a haña chèns di kore bai bini ku su kasá huntu kuné den outo sintá, siendo tin e pretenshon ku e tabata bou di menasa ku arma di kandela.

Un tipo di aktitut asina no ta kuadra pa un persona ku ta bou di menasa ku arma di kandela.

Fiskal finalmente a hasi e demanda di 8 aña kastigu di prizon p’e duo Mathshir Laken  i Joel Adriana, siendo Hues mr. drs. S.M. van Lieshout a keda ku dia 2 di aprel lo e dikta sentensia.