Komplòt pa kita tas ku plaka a bin kaba den kastigu di prizon

WILLEMSTAD – Un mucha muher ku yama Trisha Martis di 23 aña di edat tabatin un relashon ku un mucha hòmber ku yama Michelangelo Soliana. Despues e akto amoroso aki entre Trisha Martis i Michelangelo Soliana e grabashon a bin resultá riba whatsapp i Trisha Martis a rabia mashá i a pidi su prima ku yama Akisha Martis pa yud’é pa tuma vengansa kontra di Michelangelo Soliana.

E prima a aserka Queendrely Lourens, kende lo mester a buska un persona pa kita un tas ku 15.000 florin for di Michelangelo Soliana. Esaki a sosodé dia 21 di ougùstùs 2020.

E kòmplòt aki sinembargo no a kana bon, pasobra Trisha Martis a bin basha abou riba Queendrely Lourens ku kier a laga parse ku ta un otro persona a hasi e djòp, siendo tabata e mes, pero ku kara tapá i ku kapuchon na kabes.

Den sala di Corte e kaso a kue un buèlta sumamente ferfelu. Pa kuminsá e víktima Michelangelo Soliana tabata presente den sala di Corte kompañá pa abogado mr. Anthony Eustatius.

E akusadonan Trisha Martis tabatin abogado mr. Kleist pa su defensa, siendo Akisha Martis abogado mr. Everret Wilsoe.

E akusado Queendrely Lourens tabatin abogado señora mr. Moenir Alam pa su defensa.

Den sala di Corte e kaso a bira un bululú di otro mundu, kaminda e akusadonan bou di preshon di Hues mr. S.M. van Lieshout a haña nan ta huramentá i finalmente a papia bèrdat, bisando ku ta Queendrely Lourens mes a kita plaka for di Michelangelo Soliana.

E akusado Queendrely Lourens tin un pasado ku hustisia i a bisa ku e kier a kambia su bida, pero ta su frei Akisha Martis a hink’é den e situashon. El a bai yuda, pero e kos a salié di malu.

Abogado mr. Moenir Alam a lansa fuerte atake kontra di un Polis Ferero kende lo ta un agente polisial di masha mal reputashon segun e abogado. Fiskal a demanda un kastigu di prizon di 7 aña inkondishonal pa Queendrely Lourens, pero pa Trisha Martis un kastigu di prizon di 3 aña di kua un aña kondishonal. Anto pa Akisha Martis un kastigu di 36 luna di kua 18 luna kondishonal. Hues a keda ku dia 31 di maart lo dikta sentensia.