Kumpra edifisionan i logra surplus finansiero di 175 mion florin

WILLEMSTAD – Èks Promé Minister Ivar Asjes tambe a tuma nota di e diskushon enkuanto e rapòrt di Kontrolaria General den kuadro di e kompra i benta di edifisionan di Kas di Kòrsou na Hulanda.

Na promé lugá, mester ta bon kla ku dia a tuma e desishon final pa bende e edifisionan di Kas di Kòrsou, Ivar Asjes no tabata Promé Minister.

Durante e periodo di 7 di yüni 2013 te 31 di ougùstùs 2015 ku Asjes a fungi komo Promé Minister di Kòrsou, Konseho di Minister a tuma e siguiente desishonnan relashoná ku e tema aki.

Dia 15 di òktober 2014 Konseho di Minister a aprobá pa pidi sosten di e ekspertonan Hulandes ‘Nadorp Bedrijfsmakelaars’ manera a keda proponé pa e Ministerio di Asuntunan Interno i di Reino.

E ekspertonan aki a keda kontratá pa asesorá e Minister Plenipotensiario di Kòrsou di e tempu ei den e trayekto pa kumpra edifisio na un sitio mas sentral komo ofisina nobo di Kas di Kòrsou.

Tambe e ekspertonan Hulandes a keda enkargá pa asesorá ku benta di e edifisionan eksistente di Kas di Kòrsou.

Ta bon pa remarká ku Konseho di Minister a tuma e desishon aki despues di a pidi i risibí konseho di tantu e Ministerio di Asuntunan General komo esun di Finansa.

Dia 20 di mei 2015 Konseho di Minister a bai di akuerdo ku e proposishon di Minister Plenipotensiario pa kumpra dos edifisio monumental situá na Prinsegracht 63-65 komo ofisina nobo pa Kas di Kòrsou na Den Haag.

Na mes momento, Konseho di Minister a aprobá e proposishon di Ministerio di Finansa pa hasi un adaptashon den presupuesto p’asina Kas di Kòrsou por disponé di e fondonan nesesario pa kumpra e edifisionan aki.

Segun Asjes, finalmente Gobièrnu a kumpra e edifisionan na Prinsegracht 63-65 pa un montante di kasi 700.000 Euro òf 1.6 mion florin ménos ku e preis original.

Un desishon ku segun rapòrt di Kontrolaria General atrobe a keda ratifiká, dia 28 di desèmber 2016 ora Parlamento a aprobá e di dos kambio di presupuesto 2015, inkluyendo un montante di 4 mion florin pa finansiá kompra di e edifisionan situá na Prinsegracht 63-65.

Asjes a indiká ku e eskoho pa yega na un ofisina nobo pa Kas di Kòrsou, situá mas den sentro di Den Haag, tabata un nesesidat urgente pa por logra un servisio muchu mas aksesibel pa e komunidat Kurasoleño na Hulanda.

Alabes por a ubiká e ofisinanan di finansiamentu di estudio ‘SSC’ i turismo ‘CTB’ na Hulanda den mesun edifisionan aki pa asina huntu logra un servisio mas efisiente.

Esaki sin duda lo a aliviá nos presupuesto i skapa komunidat di Kòrsou tambe basta gastu na entre otro hür ku ta paga p’e edifisionan ku SSC i CTB ta okupá na Hulanda.

Asjes ta lamentá ku te ainda no a logra realisá e paso lógiko pa ubiká SSC i CTB huntu ku Kas di Kòrsou den edifisionan na Prinsegracht 63-65.

For di desèmber 2015 dos eksperto i èks diplomátiko Hulandes, esta mr. Eric Niehe i drs. Pieter Marres, a konfirmá ku atkisishon di e edifisionan na Prinsegracht 63-65 a resultá un adelanto grandi i ku tin sufisiente espasio pa fasilitá e ofisinanan di SSC i CTB.

Hasta nan a indiká ku CTB por a haña su propio entrada p’asina establesé su propio presensia i duna e atenshon spesífiko ku su partnernan ta rekerí.

Pa Ivar Asjes ta un honor ku e por a fungi komo Promé Minister di Kòrsou pa mas ku dos aña.

“Mi a hasi mi trabou di forma honesto, konforme mi konsenshi i semper mi a trata na liderá nos país di un forma konstruktivo”.

Segun Asjes, su Gabinete a duna un kontribushon signifikante pa Kòrsou porfin logra pone òrdu den finansa públiko.

Ta p’esei datonan di Estadistika di aña 2015 ta komprobá ku e trabounan ku Gabinete Asjes a realisá te 31 di ougùstùs 2015 a kontribuí na e oumento di empleo, kresementu ekonómiko leve i un posishon di likides fuerte ku Kòrsou a logra realisá, Asjes a indiká finalmente.