Lider di partido POR satisfecho cu e reunion na bienestar di pariba brug

Dialuna mainta tabatin un encuentro publico historico den sala di Parlamento unda tur Minister tabata presente pa conta riba proyectonan na San Nicolas y Pariba di Brug en general. Riba peticion di Parlamentario Alan Howell, Presidente di Parlamento a yama e encuentro aki, unda tur Minister a honra e invitacion y a comenta riba e proyectonan cu ta den tapara p’e area aki di Aruba.

Alan Howell tabatin e oportunidad pa realisa un serie di pregunta, pero lamentablemente debi na falta di tempo, e por a realisa preguntanan na solamente dos mandatario.

Ora el a hiba palabra el a bisa cu e reunion aki ta hopi importante, pasobra ta drentando den temporada di campaña y semper ta mik riba San Nicolas y t’e mesun hendenan di San Nicolas y Pariba di Brug a pidie pa pidi e reunion aki pa scucha di cada gobernante kico nan plan ta pa pariba, ki dia ta cuminsa y ki dia ta caba cu e proyectonan aki.

Howell a bisa cu hendenan di Pariba di Brug a wordo desprecia, hasta a menciona un candidato cu a haya 1900 voto di pariba so y a nenga drenta Parlamento, es decir, e voto di e 1900 hendenan aki a gewoon bay perdi y ta importante p’e hendenan sa cu esaki a pasa, pasobra awor cu tin eleccion atrobe ta core bay busca e votonan aki.

Bayendo riba e preguntanan, e Parlamentario y lider di POR, Alan Howell a bisa cu e pregunta cardinal pa Prome Minister riba e refineria ta si e ta sigur cu pa mei lo por tin un contesta definitivo y si t’asina pa ki tempo Quantum lo por funciona y cuanto hende lo wordo emplea? Tambe a puntra si Eagle lo habri su industria tambe cu Quantum y a pidi Minister President si e por duna un splicacion riba esaki y con e ta bay funciona.

Pa loke ta MFA y hulpbestuurkantoor, Howell a bolbe enfatisa cu un biaha mas San Nicolas a keda atras, a traha MFA na barionan unda e cantidad di voto ta mas zwak y laga San Nicolas pa ultimo y a keda sin nada.

“Hendenan di San Nicolas lo kier wak un MFA prome cu eleccion. Lo desea di sa si Prome Minister lo por ‘tover’ un MFA pa San Nicolas y si t’asina pa ki tempo lo por wak inicio di esaki?”

Otro pregunta cu el a haci ta riba e lusnan pa Bernhardstraat, a bolbe haci e peticion pa haya esakinan, cu no ta importa si ta ‘fancy’, pero ta algo urgente.

“Ki tempo lo por tover pa sikiera tin un tiki lus den Bernhardstraat, sigui bay te den caya principal?” E ta confia cu Premier Wever-Croes lo haya un solucion p’esaki mas pronto cu ta posibel.

Tambe a puntra si Prome Minister por splica si tin barionan riba lista pa haya lusnan di caya mas liher cu ta posibel, igualmente asphalt y verkeerdrempels?

Pa loke t’e parti di tereno Alan Howell a puntra ki tempo ta bay sigui cu e parti di otorga tereno, pasobra hendenan di pariba kier yega na nan tereno. Den e cuadro aki a puntra si tin verkaveling pariba y mas specificamente na Colony? Igualmente con leu e proceso ta pa haya tereno pa cunukero y criador di bestia pariba.

A puntra tambe con leu e negociacionnan of comunicacion ta bayendo cu e famia di loke ta Hotel Hickenson, pasobra ta mahos bista y ta hopi aña ta en espera di un solucion pa cu e edificio aki.

Alan Howell a puntra e mandatario tambe ki tempo e doñonan di bar lo por haya e reunion cu nan ta en espera pa hopi tempo caba? E ta considera cu ta importante pa haya un solucion pronto pa evita cu malesanan wordo plama y ya tin otronan cu a cuminsa cu e negoshi aki na otro partinan. Tambe a puntra con a sigui cu e proyecto di Carnival Village?

Bayendo den direccion di Minister di Turismo, Salud y Deporte, Howell a pidi atencion pa Lago Heights Sport Park mirando cu e ta den un situacion deplorabel. A puntra riba ki tempo ta calcula cu Hotel Secrets lo finalisa?

A gaba e expansion di IMSAN y a puntra con ta sigui cu e parti aki pa trece mas servicio pa salubridad, kico e ta encera y pa ki tempo e lo keda cla?

Alan Howell a puntra riba riba e proyecto di basket den Village cual a cuminsa bon, pero no tin movecion, “ki tempo ta sigui y ki dia e ta caba?” Tambe a puntra riba e proyecto di ETAO y a pidi atencion pa veld di bala na Mabon p’e wordo drecha, igual p’e veld di bala na Brazil y esun di La Fama. Mirando e limitacion di tempo, na final Alan Howell a experesa cu e lo pidi otro reunion publico pa haci e demas preguntanan tocante desaroyo di Pariba di Brug.