Tur loke Gabinete Wever Croes a haci na San Nicolas tabata proyectonan di AVP

Haci grandi cu cosnan di otro, tabata e mansahe cla y raspa cu miembro di fraccion di AVP, Mike de Meza tabatin ayera mainta durante di e bijeenkomst publico cu a wordo pidi pa lider di POR, Alan Howell relaciona cu proyectonan pa San Nicolas y pariba di brug. Berguenza tabata cu Prome Minister Evelyn Wever Croes a invita San Nicolas Business Association pa atende e reunion aki, pero cu Presidente di Parlamento no a permiti nan entrada den Parlamento.

Den un forma contundente Mike de Meza a mustra cu ta un berguensa cu tres fraccion di e mesun Gobierno, ta bin Parlmento pa cuestiona maneho di otro, cuestiona intencion politico tras di e reunion aki, mustrando un biaha mas cu ta un Gobierno bon bruha ta dirigiendo e pais.

Manera nos di AWEMainta a mustra den otro articulo, e intencion di e reunion tabata bisto uno caminda lider di partido POR a yama un reunion cual ta parti di su campaña electoral, caminda su atencion ta riba gana simpatia for di pueblo di San Nicolas.

Sinembargo na mes momento e tabata un intento fastioso pa trata di cuestiona un maneho di un Gobierno cu Howell ta sostene pa mas cu tres aña caba ya cu si ningun desaroyo a tuma lugar den  e bario di San Nicolas, su persona y su fraccion tambe tabata culpabel n’esaki.

Mike de Meza a mustra cu e ta sostene totalmente e intencion di Alan Howell tras di e reunion, mustrando cu San Nicolas como e ciudad cu pa añanan largo a determina e desaroyo economico di henter e pais, merece mas consideracion y ta di lamenta cu den ultimo tres aña y mey, tur loke Gabinete Wever Croes a logra di desaroya na San Nicolas, ta proyectonan cu Gobierno di AVP a laga atras den ehecucion.

No tin nada cu Gobierno actual a crea pa San Nicolas, no tin nada absolutamente nada cu a wordo crea y aki AWEMainta kier señala cu Prome Minister Evelyn Wever Croes dado momento kier a probecha pa papia malo di Gobierno di AVP, tratando pa pasa pa heroe mencionando cu su Gobierno a logra di kibra un di e contractnan di mas malo den historia di e pais, pero sin cu e tabatin curashi pa bisa kico el a haci realmente.

En realidad Evelyn Wever Croes cu abogadonan di compania di su famia, a permiti CITGO bandona Aruba sin cu nan a paga caso 300 miyon dolar pa ‘contract breach’, esta cu nan no a cumpli, pero pa Gabinete Wever Croes tabata necesario p’e compania aki, cu tabata pagando  pa e terenonan di e refineria miyones, cu mester a paga e suma di 300 miyon dolar, pero caminda awor  mas cu nunca pais Aruba lo por a haci hopi bon cu e suma di placa aki. Mike de Meza a mustra despues cu ta un berguensa cu hendenan di mesun Gobierno aki, ta acusa coleganan di Gobierno di ta haci politikeria cu e asunto di San Nicolas, cu ta creando division mientras cu e bario di San Nicolas aki, pa añanan largo a carga economia di e pais, a percura pa prosperidad di henter e pueblo di Aruba.