Den “afscheidbeleid” di Gobierno Chris Romero lo haya nombramento den Utilities NV y Ady Thijssen lo bay pa RdA

Pa algun luna caba ta ser mustra cu Gabinete Wever Croes ta ehecutando su “afscheidbeleid”  caminda cantidad di nombramento ta tumando lugar, a pesar cu tanto CFT como Gobierno Hulandes, ta exigiendo di Gobierno pa reduci su gastonan di personal.

Fuera di tuma hende den servicio tin promocionnan tumando lugar, poniendo sostenedornan di partido MEP den posicionnan clave cu den futuro e partido tin mester ora cu e lo asumi un rol den oposicion.

Un politica cu partido MEP ta conoci p’esaki y cu a nace bou di ex lider di e partido Nelson Oduber, caminda a yena e aparato di Gobierno cu MEPistanan, kendenan semper a hunga un rol den henter e proceso politico na Aruba.

E biaha aki tin mesun situacion cu antes caminda partido MEP ta dunando indicacion cu e ta bayendo bek den oposicion, despues di lo termina su periodo di gobernacion, sin cumpli cu loke tanto el a priminti di duna pueblo ora cu e ta den Gobierno.

Prome Minister Evelyn Wever Croes ta guiando un Gobierno cu no tabata sincero cu pueblo, cu no a respeta pueblo su cartera y a hiba un maneho financiero di ranca mas tanto cu por, for di cartera di pueblo, causando un inflacion increibel cu a hinca henter e pais den problema serio.

Pa completa obra a surgi e pandemia di corona virus caminda rond economianan a cay den otro y aki na Aruba no tabata diferente, pero ta un hecho cu prome cu e pandemia a lanta cabes na 2020, ya caba e pais tabata pasando den un pandemia politico na man di e Gobierno di MEP.

Recientemente a drenta informa extra oficial cu en berdad Minister Chris Romero lo no subi lista politico mas y lo bandona e arena politico, pero cu e lo wordo recompense c’un nombramento den un posicion den e compania estatal Utilities NV pero ainda no ta conoci e encargo cu e lo bay asumi.

Esaki ta parti di e ‘afscheidbeleid’ di Gabinete Wever Croes cu ya caba a cuminsa pone su hendenan den posicionnan clave sea den e aparato gubernamental of den companianan estatal prome cu cambio di Gobierno tuma lugar.

Otro informacion cu pa algun dia caba ta ser menciona y cu AWEMainta a yega di publica caba riba dje, tin di haber cu Presidente di Parlamento Ady Thijsen tambe tambe lo haya un nombramento den un compania estatal como regalo pa tanto aña di servicio den partido MEP.

Thijsen ta otro candidato cu lo no aparece riba lista di MEP pa proximo eleccion na luna di september y manera ya e rumornan tabata indica den pasado, Ady lo bay haya un puesto den e compania estatal, esta Refineria di Aruba. AWEMainta a yega di mustra den pasado cu e posibilidad lo tabata existi pa Ady bira Director di RdA, pero su falta di conocemento riba tereno petrolero, tabata e obstaculo di mas grandi y ainda tin cu mira, si e rumornan aki ta berdad, cual t’e posicion cu e lo ricibi awor cu e lo ta bandonando politica gobernacion.