Fiskal a pidi 20 aña di kastigu pa Renny Ocando Curiel, pero Hues a dikta 12 luna

WILLEMSTAD – Fiskal Janssen a demandá un kastigu di prizon di 20 aña pa Renny Ocando Curiel. E kastigu di prizon menshoná ta  kitando e periodo ku el a pasa den aresto preventivo. Enfin, un otro sospechoso Thaino Mathilda di 25 aña di edat i ku abogado mr. Prevo na su banda, ya durante tratamentu di e kaso últimamente, a keda konsiderá liber di e akusashonnan relashoná ku e asesinato di  S. Quammie i R. Gomez Hermoso, pero mas ainda tambe liber di maltrato di S. de Lanoy.

E siguiente akusado den e asesinato dia 9 di febrüari 2019, tabata Igabriel Alberto di 40 aña di edat,  kende ta envolví tambe den e asesinato kruel n’e nogoshi di pan “Libanesa” riba Caracasbaaiweg. Pero den e kaso aki Fiskal a hasi demandanan di sea 20 aña, sea 30 aña òf sea 10 ana di prizon dependé kiko Korte husga den algun otro kaso ku tambe Igabriel Alberto ta metí aden.

Hues señora mr G. Edelenbos diktando sentensia a konkluí ku e pruebanan di Ministerio Públiko no ta konvinsente i asina ei a duna un kastigu di solamente 12 luna di prizon na Renny Ocando Curiel, kitando e periodo ku el a pasa den aresto preventivo. Renny Ocando Curiel a bisa ku el a kore bai i no a tira, esei enbèrdat por a mira riba e vidio.

Pero 12 luna di prizon pa ta kómplise den e bendementu di arma di kandela, kitando e periodo ku el a pasa den aresto preventivo ta nifiká ku Renny Ocando Curiel por regresá su kas numa. Pa loke ta trata e hòmber Igabriel Alberto Hues mr G. Edelenbos a haña ku no tin sufisiente prueba ku e tabata presente na e sitio, komo ta a deklar’é liber.

A hasi uzo di testigunan anonimo D57 i F57 ku Hues finalmente no tabata masha bou di impreshon di esakinan su deklarashonnan.