MEP lo presenta Alvin Molina como remplasante di Chris Romero riba lista

Tin un dicho cu ta bisa na Hulandes: “De kogel is door de kerk” loke ta nifica cu cierto asunto ta cla, cu el a keda concretisa y esaki t’e caso di e futuro politico di actual Minister Chris Romero.

Fuente yega na partido MEP a informa y despues confirma cu ta un hecho cu Minister actual Chris Romero ta bandonando politica y lo no ta riba lista di partido MEP pa proximo eleccion.

Ta for di algun tempo caba tin speculacion tumando lugar riba e futuro carera politico di Romero, pero ta t’awor ta parce cu tin un decision definitivo den e asunto aki, caminda partido MEP lo no tin Chris Romero como su candidato fuerte representando e bario di San Nicolas.

Un asunto cu awor a haya mas claridad y na mes momento e mesun fuente a sigura AWEMainta cu partido MEP ya caba lo a yega na un acuerdo riba otro candidato cu mester bira e candidato principal p’e bario di San Nicolas y kende lo haya e puesto number 3 tambe riba e lista geel.

Ta trata aki di un oficial di Polis na San Nicolas, esta e ‘Hoofd Inspecteur’ Alvin Molina, kende lo subi un lista politico pa prome bes y partido MEP ta kere cu su persona t’esun indica pa hala voto pa MEP den e bario di San Nicolas.

Pa algun tempo caba tin rumornan circulando riba e posibilidad cu Alvin Molina lo ta riba lista di un partido politico pa proximo eleccion ya cu lo tabatin cierto contacto y hasta combersacion cu lo a wordo hiba cu hendenan cerca di partido AVP.

Un rumor cu nunca a cristalisa, ya cu den mesun periodo tabatin indicacion cu Molina ya lo tabata negociando cu partido MEP p’e bira representante di MEP pa San Nicolas den un periodo cu e partido no tabata contento cu e rol politico cu Romero lo tabata hungando.

Chris Romero den ultimo aña practicamente no tabata riba e scenario politico, a hiba un maneho aleha y hopi incognito como miembro di Gabinete Wever Croes, loke a lanta un serie di rumor rond di su persona y su futuro politico.

Na mes momento cu e informacion aki a bin dilanti, tambe a lanta e pensamento cu e rol cu miembro di fraccion di MEP, Rocco Tjon lo a spera di carga p’e partido den e proximo proceso electoral, lo no continua y e decision pa bay cu Alvin Molina como sucesor di Chris Romero, ta mustra cu lo no tin confiansa den credibilidad di e candidato Rocco Tjon mas.

Probablemente un di e puntonan cardinal den e decision di partido MEP pa laga Tjon cay como candidato destina pa tuma over pa Romero tanto riba lista di e partido como candidato di San Nicolas, ta publicacionnan continuo riba pedofilia den cual a ser mustra cu lo a sosode den seno di su famia.

E decision di partido MEP riba e escogencia di Molina riba Tjon, lo tin di haber cu e asunto aki, cu sin duda no ta uno mucho positivo p’e bira parti di cualkier campaña cu e partido lo tin cu enfrenta den e proceso electoral  tumando lugar. Inicialmente a spera c’un candidato cu a bay riba lista den eleccion 2017 lo tuma e posicion riba lista di Romero over, pero parce cu partido kier un candidato fuerte pa sigura e votonan cu Romero a logra gara pa MEP den ultimo dos eleccionnan y awor esaki ta keda den man di Alvin Molina, mientras cu Rocco Tjon no ta ser mira como e candidato adecua pa carga e responsabilidad aki.