Sabiduria den nos alegria !

Nos ta den siman di nos celebrashon y refleccion di nos Dia Nacional, Dia di nos Himno y Bandera 18 di Maart. Tabatin e Festival di Canto y tabatin e competencianan Poeta di Patria 2021. Ambos actividad a conoce nan ganadornan cu lectornan por a admira den nos prestigioso corantnan local siman pasa. Lady Ruth, cu dos aña pasa a sali como tercer ganador den Poeta di Patria, a sigui su curazon inspira y a participa atrobe e aña aki, ya cu no tin limite den e participantenan.

E ta un competencia habri tur aña pa tur poeta, sin importa cu bo gana caba un of dos biaha, pasobra e inspiracion di amor pa nos patria nunca ta caba. Kemen, bo por participa cuanto biaha cu bo kier y si bo tin suerte gana atrobe. E ta keda un reto pa tur poeta cada aña atrobe. Nos pabien na tur e ganadornan di e Festival di Canto y di Poeta di Patria 2021. Nos ta felicita pueblo di Aruba cu nos Dia Nacional y ta laga e siguiente poema resona den boso mente, alma y curazon, pasobra nos tur ta stima nos dushi isla Aruba, nos hogar, nos cas.

E ta e poema cu cual Lady Ruth a participa den Poeta di Patria 2021, den Cas di Cultura hunto cu 13 otro participante. Pabien n’e comision organisador pa nan bon trabao. Pabien na Suzy Maduro kende a fungi como e Maestra di Ceremonia y Pabien na nos Ministro di Cultura sra. Xiomara Maduro pa su bunita palabranan e anochi ey. Ata aki e poema : 

* * * * *

TUR CU TIN PA ARUBA !.

Nos pasado, Awe, nos futuro, nos tur ta stima nos dushi, elegante  y bunita Aruba

Tur cu tin Aruba na pechu, awe nochi cu tapaboca bisti akinan  presente

Nos tur ta sigui cuida nos mes y yuda  nos prohimo ruman cu nos bon Dios na nos mente

Na Aruba tin hopi hende cu a ricibi un ‘lintje’ pa nan bon trabaonan di duna y yuda

Tur cu tin nos dushi isla firme y potente,  na curason y na mente

Ta biba  e.o. di turismo , su progreso interesante den projectonan y bon desaroyo

Tin cu ya a lubida su warawara,  rembak, driguidek y panboyo

Mientras hopi keto bay ta stim’e cu un amor y pasion fuerte creciente

Aruba , mi dushi  perla Aruba, mi no kier bo hoga of bay perdi nunca!

Bo pueblo cu gradicimento y su cordialidad ta e mihor fruta

Ohala cu nunca, nunca  influencianan multicultural  surpas’e

Tur cu tin, tur cu ta, tur cu sa ,cu di nos tur, amor y  respet e merece

Den nos oracion tur dia pa  Creador sigui proteh’e y bendicion’e

No laga olanan di odio, rabia of envidia caba cu’ne ni machic’e

Bientonan dushi  di tur 4 skina, sigui refresca Aruba, nos humilde cas

Y tur cu tin, cu ta, cu sa…..cu aki nos ta biba bendiciona, den luz y na paz

Ya ta 35 aña di Status Aparte , resultado di trabao politico duro logra !

45 aña cantando nos Himno y Bandera, cu orguyo nos ta recorda y celebra!

Den aña 2021, marca y impacta pa e Coronavirus cu a cuminsa aña pasa

Nos gobernantenan y pueblo, cu fe y bon comportacion, ta sigui combati y enfrenta.