Zita ta nombra mesun hende komisario den diferente NV

WILLEMSTAD – Politika na Kòrsou en general a bira un aktividat asina sushi i oportunista ku no ta straño ku hopi hende no tin konfiansa den e kandidatonan aktual pa elekshon di Parlamento ni algun dje inisternan ku ta den gobiernu pero ku pronto lo tin di bati retirada.

Siman pasá e korant aki a referi na e kèintura i ansha ku tin den serka Minister Zita Leito pa nombra mas tantu komisario posibel den posishonnan ku ta vakante den empresanan di Gobiernu pa dje forma aki ora ku un koalishon nobo subi na mando, no tin espasio pa nan nombra nan hendenan di konfiansa den e funshonnan ei.

Karta ta saliendo ku velosidat di mitrayur “rat-tat-tat” di mr. Donald de Palm, Direktor di SBTNO pa raporta na Ministernan ki nota e por duna e kandidatonan predilekto dje Minister pa kendenan el a manda pidi e evaluashon obligatorio.

Mientrastantu e Minister ta sigi lora su mes den mas problema ku broyo ku ni ku tentakulo di zeekat e no por resolvé problema ku e mes ta krea.

Siman pasá mes e Minister tabata envolvi den bululu pa un tereno na Jandoret kaminda batayon di simpatisante a bai kana den mondi tur na kamisa largu, pero a haña nan na kareda pa drenta outo kore bai ora yiu di un pionero ku a promove práktika di deporte, nan a kita tereno for di dje.

Ku ta trata aki di konsentrashon di poder i ehersisio di influensia den maneho i direktiva dje kompanianan ta mas ku opvio i kasi-kasi por ser konsiderá komo ilegal, inmoral i kriminal ounke e proposishon pa nombra komisario den dos diferente NV ta den un bachi legal.

E dos kompanianan en kuestion kaminda e Minister ke nombra e mesun persona ta Curt Belfor, kende ta hurista.

E proposishon en kuestion a yega ofisina di mr. Donald de Palm dia 22 di januari ultimo pa nombra komisario den Hunta di Komisario na Woningbouw Curaçao N.V.

E persona ku ta komisario den dos diferente NV di Gobiernu ta sr. Curt Belfor, eksperto huridiko den e futuro joint venture entre Fundashon Wega di Number i Fundashon Wega di Plaka ku lo bai kai bou di un paraplu.

E hecho aki a sobresali, pasobra e propio partidonan ku ta den kampaña elektoral ta papia kuenta di duna hende chèns, pero si ora tin chèns i e mesun hende ta haña chèns dos biaha, no tin repartishon hustu.

Un dje faktornan ku lo por yuda frena e tipo di faboritismo aki ta si huntu ku e proposishon di Minister pa nombra un kandidato pa komisario, e manda e lista di  komisarionan ku ta den hunta aktualmente.

Di e manera aki SBTNO por hasi un chekeo i eventualmente lo por hasi un anotashon, no rektifika ni hala Minister su atenshon, pasobra nan ta hasi loke nan tin gana di tur manera, pero sikiera a anota esei pa futuro.

Den e kaso di nombramentu di komisario na Woningbouw nos a nota tambe un tendensia ku tin den e Ministerio di Zita Leito pa nombra Hulandes-Europeo siendo ku ya kaba tin reklamo ku hendenan ta puntra pa ki ta manda yiu di tera bai studia pa ora nan kaba, ta Hulandes Europeo ta den tur funshon kaba.