Medidanan mas fuerte na vigor desde 20 di maart 2021

Ariba 19 di maart 2021, Crisis Team y gabinete Wever-Croes a tene un conferencia pa anuncia medidanan mas drastico pa loke ta trata coronavirus y e estado actual di e efectonan di esaki riba nos comunidad. No ta nada nobo cu reglanan mas fuerte ta wordo estableci pa asina controla plamamento di e virus, vooral cu cifranan di casonan positivo ta subi y baha constantemente y p’e ultimo temponan cu esaki a subi mas tanto, compara cu inicio di maart unda e cifranan tawata bou 200 ainda.

P’e mes motibo aki a anuncia e aumento di regla na vigor desde 20 di maart.

Compras:

-1 persona so di cada famia

-Recomenda pa bisti tapa boca pafo tambe den caso cu no por mantene distancia di 1.5m

-Ora di cera ta 11’or pm

Encuentro social na cas:

-No ta permiti actividad social na cas; 0 bishita (invitado-huesped)

-Bishita familiar (limita), di cuida of medico ta permiti

Gebieds- en samenscholingsverbod/Aglomeracion:

-Prohibicion pa aglomera riba espacionan publico, manera parkeerplaats y beach, desde 7’or di anochi te cu 5’or di mainta.

-No ta permiti pa ta riba Rif durante TDQ

-Samenscholingsverbod: 2 persona maximo por ta hunto

Horeca:

-Cantidad di persona adulto na mesa den restaurant paden y pafo ta 2 maximo. (Muchanan bou di 12 aña no ta conta den e regla)

Excepcion: personanan bibando bou di e mesun dak por sinta 4 paden n’e mesun mesa of 6 pafo

-No ta permiti bailamento

-Ora di cera ta 11’or pm

Deporte:

-Tur deporte organisa y structura di tur edad ta permiti sin limite di atleta, coach/trainer, pero sin publico

-Mester ta pertenece na ASU, COA of registra na IBISA

-Mester registra nomber di esnan cu ta train/competi cu fecha hunto pa un periodo di 2 siman cada bes y pa tur edad

-IBISA lo controla

-Bush League y Contact Sport den tur edad ainda no ta permiti

GYM:

-Depende di grandura di esaki mester mantene 1.5m di distancia

-Obligatorio pa bisti tapa boca ora di move di un espacio pa otro of papia cu otro persona

-Zorg pa tin bon ventilacion

-E ekipo mester wordo limpia entre cada persona

‘Faya bo Haya’: Lo impone multa/boet halto y lo wordo cobra mesora na esnan cu ta viola reglanan. Horeca cu no ta cumpli por wordo sera te proximo aviso.

Casnan di cuido: Cuido di nos grandinan tin medidanan di precaucion.

Riba lama: Boto y yate no ta permiti aglomeracion; no mas di 4 persona. Catamaran y boto di charter 50% capacidad.

Entretenimento musical: Entretenimento musical por tin pero unicamente cu 1 musico, background music

Entiero: No ta permiti mas cu 10 persona paden na e mesun momento.

Permiso pa actividad: Permisonan pa actividadnan publico durante e periodo aki no lo wordo otorga.