Tiramento Na Pos Chikito Atrobe

Adres unda tiramento a sosode.

POS CHIKITO- Den careda di 7’or diadomingo awenochi, polis a haya informe di tiro dilant’i adres #265 unda cu diferente unidad a bay investiga e area. Aparentemente e tiramento a sosode den style di un ‘drive-by’; e autonan envolvi ta un Mitsubishi cora #A-73681 y un Hyundai Getz shinishi (number di plachi desconoci n’e momento). E Getz lo a los 3 tiro minimo ariba otro auto envolvi. E mitsubishi cora ta marca cu por lo menos 1 tiro di e 3 cu a los. No hopi rato despues polis a haya informe di otro tiramento directo riba adres #217-A. E habitante di e cas no a resulta herida y a informa cu e tironan lo a bin fo’i un persona color scur den un Mitsubishi cora. E polemica lo a inicia na un minimarket den e area di Pos Chikito unda dos persona tawata buscando e persona kende nan a tira riba dje.

Actualmente tin investigacion andando pa loke ta trata e caso aki, ta revisando e camaranan di seguridad di e minimarket pa wak si ta logra capta algun sospechoso y ta continua revisa e area pa wak si tin huls (casca di amunicion) benta rond riba flur. Pa cualkier informacion cu ta concerni e caso aki por yama tiplijn di polis na 11141.