CBN declarando Gobierno guera via di Parlamento

AWEMainta ta haya hopi remarcabel cu Canadian Bank Note (CBN), cu t’e operador di loteria na Aruba desde aña 2011, ta sali net awor ataka Gobierno di Aruba frontal den media pa cu e concepto di Ley di Wega di Placa (Concept Landsverordening Kansspel en Kansspelautoriteit), cu Parlamento lo trata e siman aki.

E concepto di Ley aki, cu tin hopi tempo caba na Parlamento, ta riba agenda y ta keda trata e siman aki den reunión di Parlamento di Aruba. Ta incomprendibel y no ta algo normal cu CBN a manda un carta di menasa fecha 15 maart 2021 pa Presidente di Parlamento di Aruba.

Te hasta un copia pa CAFT y faltando respet dor di no manda copia di e carta pa Minister di Deporte Dangui Oduber, lubidando cu e Minister aki legalmente ta encarga cu Fundacion Lotto pa Deporte.

Ta mas cu obvio CBN, un compania cu bon reputacion internacional, a dicidi den aña  di eleccion, di join e Raad van Toezicht di Lotto dor di drenta arena politico cu atake riba Gobierno di Aruba. Dicon asina?

AWEMainta na un manera obhetivo basa riba hechonan corecto ta bay bek den historia di Fundacion Lotto pa Deporte.

Pa nos ta bon cla si cu AWEMainta ta full di acuerdo cu mester bin un Ley pa regula y supervisa (controla) loteria y catochi na Aruba. Sigur den e situacion actual unda Fundacion Lotto pa Deporte ta biba den secrecia sin ta transparente den su maneho pa cu Gobierno di Aruba y pueblo di Aruba.

E actual Raad van Toezicht di Lotto bou maneho di Silvo Janga y su aliadonan ta lubida cu Lotto ta un fundacion netamente di Gobierno (mihor bisa pueblo) cu hasta tin fiansa miyonario di Gobierno di Aruba.

Porcierto, e compleho deportivonan cu Lotto tin den su poder ta patrimonio di pueblo. Ta bisto cu Lotto pa Deporte ta minando e autoridad di Minister di Deporte pa por hiba un maneho sostenibel unda deporte ta haya realmente su “fair share”.

Ta hopi straño pakico e doño di curpa mes cu tin e licensia pa organisa loteria aki na Aruba, esta Fundacion Lotto pa Deporte no a sali defende su punto di bista den e caso aki.

Ta berdad cu CBN bou Gobierno di diferente signatura a duna asistencia tecnico di IT na Lotto pa Deporte. E asunto aki a cambia completamente ora cu na november 2009 Silvio Janga y su aliadonan a drenta den Lotto y te dia di awe mayoria di nan tey ainda den Lotto despues di mas cu 11 aña.

E grupo aki di Silvio Janga, Elias Kock, Flavio Faneyte y Tony Kamperveen na 2011 casi a manda Lotto pa Deporte bancarota y a pone cu Lotto mester a fia miyones di placa na AIB y CMB.

Na juli 2011 Lotto a fia miyones di placa na CMB cu garantia di CBN. A cambio di esey Lotto pa Deporte a firma un management agreement 2011 cu CBN. Sigur ta berdad cu CBN a rescata Lotto bou di maneho di Silvio Janga y su aliadonan di un bancarota.

Remarcabel ta cu tin informacion valioso cu ta mustra cu e “management agreement” 2011 aki a keda firma sin un dossier cu consehonan huridico, strategico y financiero riba papel.

A fia placa na banconan sin “business plan”, sin cuentanan anual y sin un raport financiero pa mustra ta kendenan ta responsabel p’e disaster financiero aki. Por papia anto di “Good Corporate Governance”?

Hopi aña despues a laga evalua e “Management Agreement 2011”. Raportnan di expertonan ta mustra bon cla cu e deal na 2011 no tabata e mihor deal pa Lotto pa Deporte. Tambe raport financiero prepara dor di accountant traha hopi aña despues cu Lotto na 2011 a mira cu Lotto pa Deporte tabata den problema serio di liquidez bou maneho di Silvio Janga y su aliadonan.

Hasta na 2011 a firma tambe un “side letter” hunto e agreement  2011 cu no tabata na beneficio di Lotto ni deporte.

Pa colmo den e agreement 2011 no a negocia ningun placa pa mantencion di complehonan deportivo ni pa paga bek e fiansa miyonario cu Gobierno di Aruba a duna Lotto.

Ta pesey mes e Minister anterior di Deporte a manda un carta (pica pica) pa Fundacion Lotto pa Deporte cu te awe nunca Lotto no por a contesta. Por bisa cu “deal” tabata “sweet” pa CBN, ta pesey mes ta bay awor den atake contra Gobierno di Aruba. Loke mester sosode ta un encuesta parlamentario riba e deal aki cu CBN.

Mientrastanto aworaki na 2021 e mesun hendenan aki den Raad di Lotto ta creando debenan cuantioso den e fundacion y pa colmo Gobierno di Aruba ta para na banda ta wak sin tuma accion fuerte. Ta parse cu e historia di 2011 ta ripitiendo su mes.

Ta increíble cu CBN apesar di sa cu tin disputa legal entre e Raad van Toezicht di Lotto y Gobierno di Aruba, tog ta sigi coopera cu e Raad. Tambe CBN cu ta duna hopi balor na integridad a sigi cu e Raad apesar di e encuestanan di corupcion haci dor di Banco Central di Aruba unda Lotto ta score masha malo mes.

Ta bin aserca cu Parlamento di Aruba a acepta un mocion pa laga Algemene Rekenkamer di Aruba investiga Lotto.

Pueblo lo kier sa ta ki interes CBN ta sirbiendo anto?

Tambe ta incomprendibel cu Gobierno di Aruba a opta pa core un risico financiero di un “claim” den un crisis di pandemia dor di bay habri e mercado di loteria aki na Aruba.

CBN no mester menasa Gobierno di Aruba (mihor bisa pueblo) cu un “claim”, sino manda nan cuentanan anual audita hunto cu e jaarrekeningnan audita di Lotto pa Parlamento di Aruba. Di manera cu den tur transparencia tur hende por mira cuanto placa CBN ta genera for di e operacion di loteria y catochi.

Ta un lastima tambe cu CBN ta bisa den su carta cu Gobierno di Aruba no kier hiba un dialogo cu nan. Di otro banda CBN mes a kies pa ta den e situacion ey dor di a sigi coopera cu e Raad no profesional di Lotto.

Por ultimo CBN mester tene den consideracion cu e “Agreement 2011” ta entre Fundacion Lotto pa Deporte y CBN.

Gobierno di Aruba legalmente no ta partido den e contracto. E argumento cu Conseho di Minister a aproba e agreement 2011 no ta valido. Conseho di Minister constitucionalmente no ta un organo cu ta mara Pais Aruba. Si tin “claim” t’e mesun Raad van Toezicht di Lotto cu tin e licensia di Loteria mester hiba Gobierno di Aruba (pueblo di Aruba) legalmente Corte den un pandemia unda mayoria di pueblo ta riba FASE, Loonsubsidie y hasta sin trabou.

Ta hopi sin berguensa bo mester ta, ya cu abo si tur santo luna ta cobra full bo vergoeding di Raad.