Demanda di 30 aña pa kada asesino den kaso asesinato dòbel na Weto

WILLEMSTAD – E asesinato dòbel den e bario Weto ku tabata dia 7 di aprIl 2019, porfin a keda tratá ku luho i detaye den sala di Korte.

E viktimanan tabata Ulrich Christopher Cresencio de Pablo “Uchi” (18) i Shurijon Noor (23) kendenan a pèrdè nan bida kruelmente na man di  Remyson Martina i Edmar Clemencia “Eto”.

LIKIDASHON KRUEL

Un biaha mas a resaltá ku ta otro likidashon kruel ku a sosodé, uzando armanan di kandela  outomátiko.

Orígen dje krimennan ta sinta den e hecho ku e señora di Edmar Clemencia (un tal M. de Meza) a kòrta Clemencia su orea ku e hòmber Ulrich Christopher Cresencio de Pablo.

E akusado Edmar Clemencia tabatin e sospecho pa algun tempu kaba ku e señora aki no tabata fiel na dje, pero el a bin sa na momento ku Ulrich de Pablo a manda un mensahe ku un kurason, riba e telefon di de Meza, bisando “dushi di mi so”. Edmar Clemencia a tuma nota di e mensahe aki i for di ei el a deklará abiertamente ku ta bai mira kiko ta sosodé  ku Ulrich de Pablo.

Tabata for di 11 di mart 2019 ku Edmar Clemencia, por sierto lider di e gèng “Army” di e bario Kurá Piedra, tabata kana ku e idea serio pa likidá su frei de Meza, anto  a hasi algun intento tambe ku tirunan di arma di kandela pa kita esaki su bida, pero esei no a logra.

E Hues ku a dirigí e seshon ta señora mr. H. Eskes, siendo na nòmber di Ministerio Públiko tabata presente señora mr. Clarelli Hato Willems i mr. C. Janssen. Fiskal señora mr. Clarelli Hato Willems t’esun ku a hiba palabra, masha dirigí i presis, manera sa ta esaki su kustumber.

Pa su defensa e akusado Remyson Martina tabatin abogado mr. Uldrich Dickens  siendo pa Edmar Rufino Clemencia e defensa tabata na enkargo di mr. Everret Wilsoe. E kaso aki ta komparabel ku un pelíkula di drama, kaminda hinter un esena di akshonnan drástiko i di hopi suspenso a tuma lugá.

Por ehèmpel e hecho ku Remyson Martina riba instrukshon di Edmar Clemencia a drenta den akshon i na sierto momento tabata ku arma di kandela den man riba kaya, tirando dirigí riba e víktima ku a haña bala i a kore drenta outo i esaki a ranka bai ku e outo bai dal. Anto Remyson Martina ku a keda mirá pa polis Marlon Schoop, kende komo agente polisial a drenta akshon pa kontrarestá Remyson Martina, disparando ku su arma reglamentario riba Martina i asina ei a heridá Remyson Martina.

E hòmber Remyson Martina a tira bèk riba polis. Pues Remyson Martina tambe a haña bala i mester a keda hibá poli pa tratamentu. E duo Remyson Martina i Edmar Clemencia a kita outo for di un persona brutalmente, pone ku esaki mester a baha for di su vehíkulo i entregá esaki na nan.

Na Seri Fortuna a pone un vehíkulo kla para warda, yena esaki ku bala sin mizèrikòrdia pa hasi komo si fuera ku Remyson Martina tabata víktima di un tiroteo ku a tuma lugá na Seri Fortuna i ku ta djei el a risibí bala. Pero e bala ku a saka for di kurpa di Martina no ta kuadra ku e balanan ku a tira riba e outo ku a pone kla na Seru Fortuna.

Ademas polis Schoop a rekonosé Remyson Martina komo esun ku tabata den e tiroteo na Weto i ku komo agente polisial el a kai aden.  Enfin, e duo Clemencia i Martina ta akusá di a kita un outo Hyundai Accent koló bèrdè for di algun persona, den kual vehíkulo tabatin ademas un tas ku kontenido, un telefon mobil Samsung, e suma di 400 florin etcetera, pertenesiendo na St.Louis Forcillus i of Hillerson Orelien. Esaki a sosodé dor di blòkia esakinan su outo riba kaminda públiko i obligá e hendenan ku arma di kandela den man pa baha for di nan outo gritando: “Baha, baha, drumi abou”. 

Pa loke ta e kaso aki ku a haña e nòmber “Phoenix” en total 7 akusashon tabatin kontra di e duo Remyson Martina i Edmar Clemencia, anto eseinan ta asesinato di Ulrich de Pablo dia 7 di aprel 2019, asesinato di Shurijon Noor dia 7 aprel 2019.

E di tres akusashon ta intento pa asesiná polis Marlon Schoop i Ineke Balentina-Reinilia, pero despues a sigui ladronisia di un outo, poseshon di arma di kandela, intento pa asesiná Modjeshka de Meza dia 11 di mart 2019, destrukshon di propiedat di Modjeshka de Meza dia 11 di mart 2019, poseshon di arma di kandela durante e periodo 11 di mart 2019 te 2 di ougùstùs 2019.  Enfin, e kaso aki ta unu relashoná ku yalusí di parti di Edmar Clemencia, kende a sinti su mes di hùrt dor di su frei de Meza, ku kende e tin 2 yu, pero ku a kòrta su orea ku Ulrich de Pablo. E siudadano Shurijon Noor no tabatin nada di haber ku e kaso, pero a haña bala i komo konsekuensia di esei a pèrdè su bida. Dia 11 di mart 2019 Modjeshka a bai for di kas i tabatin relashon ku ‘Ruenchi’, aparentemente otro frei di Modjeshka de Meza. Edmar Clemencia tabatin sospecho, pero no tabata sa ta di ken ta trata.  Edmar Clemencia a blo na kas di e wela di Modjeskha i a lòs balanan di un arma di kandela riba e outo di Modjeshka i a destruí esaki.

Ademas a kita e yabi di outo for di Modjeshka. Despues e relashon di e duo a bolbe drecha i Clemencia a laga drecha e outo di Modjeshka. Pa bai un kasamentu Edmar Clemencia dia 4 di aprel 2019 a pidi Modjeshka ‘passwoord’ di su telefon. Esei segun Edmar Clemencia tabata pa por sende  muzik den e outo, pero Edmar a probechá pa drenta den telefon di Modjeshka i a bin sa di e kòmbersashonnan entre Modjeshka i Ulrich de Pablo. E hòmber Edmar Clemencia morto yalurs a konfrontá Modjeshka de Meza ku kontenido di e kòmbersashonnan telefóniko entre e ku Ulrich “Uchi” i e ekspreshon ‘dushi di mi so’.

Entre tantu Edmar Clemencia a deklará dia 5 di aprel 2019 ku ya e sa ta ken ta Ulrich de Pablo i ku Modjeshka ta bai sa kiko ta pasa ku Ulrich de Pablo. Pero na momento ku Edmar Clemencia a deklará ku e sa ken ta Ulrich “Uchi”, Modjeshka a kòrda ku riba e mesun telefon ei e tin tambe imágennan di vidio di relashonnan seksual ku el a tene ku “Ruenchi”. Esei tabata motibu pa Modjeshka de Meza bandoná kas i bai keda serka su tio Gustavo. Edmar Clemencia dia 6 di aprel a reis na kas di e tio pa pidi e papelnan di e outo. Hinter e famia morto di miedu a bai skonde na trabou di e tio Gustavo, esta na Selikor i a kuminsá ku kontaktonan intensivo ku polis pa hasi denunsia ya ku Edmar Clemecia tabata na kas di e tio ku un arma di kandela.

Manisé, esta djadumingu 7 di aprel polis a bai buska Modjeshka de Meza na Selikor pa hasi denunsia, pero miéntras tabata hasiendo denunsia a sali na kla ku tabatin e tiroteo i ku Ulrich de Pablo a resultá heridá.

Na e momento ei Modjeshka no tabata sa ainda ku Ulrich de Pablo ya a pèrdè su bida, pero Modjeshka a respondé mesora bisando ku e tin sigur ku Eto, esta Edmar Clemencia ta responsabel pa e suseso.

E nòmbernan “Uchi” i “Ruenchi” tabata riba e telefon i Modjeshka a bisa polis ku e tabata klaramente spantá ku Edmar Clemencia lo a bai mata sea “Uchi” òf “Ruenchi”, kual a resultá un sospecho real.

Edmar Clemencia djadumingu 7 di aprel di dia kla a reis riba Ulrich de Pablo den e bario Weto aya na Chon Sin Snack, situá na Kaminda Rignald Recordino i a kuminsá basha bala riba Ulrich de Pablo, koriendo e riesgo di mata hende inosente.

Esei tabata e kaso tambe ku e hòmber di fam Noor ku a risibí bala ku a resultá e último aki mortal.

Edmar Clemencia i Remyson Martina, ámbos miembro di e gèng ARMY tabata na e sitio i a tira, anto tur dos tabatin arma di kandela. Nan a tira tambe riba e polis Marlon Schoop i bala a hera di kue señora Balentina-Reinilia.

Fiskal Clarelli Hato-Willens a demandá un kastigu di prizon di 30 aña pa kada un di e akusadonan, esta Clemencia i Martina. Tambe tin sumanan di daño i perwisio demandá. Hues señora mr H. Eskes a keda di dikta sentensia dia 8  di aprel binidero.